Vaktsina alyp, qaita koronavirýs juqtyrǵandardyń ókpesi nege jii zaqymdanady? Ortalyq kommýnikatsiialar qyzmetinde ótken brifingide joǵary sanatty infektsionist dáriger, meditsina ǵylymdarynyń kandidaty Sáýle Atyǵaevaǵa osyndai saýal qoiyldy, dep habarlaidy QazAqparat.
«Shynynda da, naýqastar arasynda vaktsina alǵandar bar. Ázirge olardyń úlesi óte tómen. Statsionarǵa túskender tipti, saýsaqpen sanarlyq. Vaktsinatsiiadan keiin naýqastar virýsty ortasha aýyr ótkizedi. Ókpeniń zaqymdanýy da minimaldy – 4, 5, 10% ǵana. Olar reanimatsiiaǵa túspegenin de aitý kerek. Statsionarda emdelý merzimi de ekpe almaǵandarǵa qaraǵanda áldeqaida qysqa», - dedi maman.
Sondai-aq, ol vaktsina alyp, qaita virýs juqtyrǵandardyń kóbi antidene qalyptaspai jatyp virýsqa tap kelgender ekenin túsindirdi.
«Eger vaktsina alǵannan keiin eki-úsh apta ishinde aǵzaǵa virýs tússe, infektsiia órshýi múmkin. Virýs shyryshty qabyqtardan ókpe tinine, sol arqyly basqa organdar men júielerge enýi yqtimal. Sondyqtan ár jaǵdaidy jeke zertteý qajet. Ádette, biz óz klinikamyzdyń deńgeiinde zertteý júrgizgen kezde, vaktsinadan keiin aýyryp júgingenderdiń kóbi 3, 5, 10 kún buryn ǵana ekpe alǵanyn baiqap otyrmyz. Statsionarǵa osyndai naýqastar túsedi. Iá, vaktsina alǵan adamdar da aýyrýy múmkin. Biraq olar jeńil túrde aýyrady. Vaktsina - syrqattyń aýyr ótýinen qorǵap, ólim-jitimniń aldyn alady. Bul - óte mańyzdy» - dedi Sáýle Atyǵaeva.
