Ústirt memlekettik qoryǵynda taǵy da qabylan fototuzaqqa túsip qaldy, dep habarlaidy "Ult aqparat".
Bul týraly QR Ekologiia, geologiia jáne tabiǵi resýrstar ministrliginń Orman sharýashylyǵy jáne janýarlar álemi komitetiniń baspasóz hatshysy Sáken Dildahmet Facebook paraqshasynda jazdy.
Onyń málimetinshe, fototuzaqqa qabylan 2019 jyldyń jeltoqsan aiy men 2020 jyldyń qańtarynda eki márte túsip qalǵan. Al jalpy Komitet ókilderi Ústirtte qabylannyń paida bolǵanyn 2018 jyly habarlaǵan bolatyn.
«Sol tusta qoryqta qabylandy zertteý boiynsha ekspeditsiia uiymdastyrylǵan edi. Ekspeditsiia qorytyndysy boiynsha, mamandar mysyq tuqymdastardyń sirek kezdesetin túri – aldyńǵy aziialyq qabylannyń paida bolǵanyn rastaǵan edi. Osydan keiin komitet jyrtqyshty zerttei bastady. Jaqynda sol qabylandy «Qazaqstan Respýblikasynyń Qyzyl kitabyna engizý» jobasy boiynsha memlekettik ekologiialyq saraptamanyń oń qorytyndysyn aldyq», - dep jazady Sáken Dildahmet.
Qabylandy Qyzyl kitapqa engizýdegi basty maqsat – Qazaqstanda atalǵan ańdy saqtaý jáne oǵan monitoring jasaý boiynsha jumysty jalǵastyrý bolyp otyr.
Panthera pardus L.,1758 qabylany – jyrtqysh sútqorektilerdiń túri. Negizinen Afrika men Ońtústik Aziiada mekendeidi.
