Ústemeaqy meditsina qyzmetkerlerin jigerlendiredi. Bul týraly Aqmola oblystyq kópbeiindi aýrýhanasy janyndaǵy provizorlyq stantsionardyń aǵa medbikesi Lázzat Bilálova aitty, dep habarlaidy QazAqparat.
Onyń aitýynsha, osyndai jaýapty sátte aty jaman indetpen kúresip jatqan dárigerlerdiń eńbeginiń elengeni meditsina salasynyń barsha qyzmetkerleriniń kóńilinen shyǵyp otyr.
«Memleket basshysy óziniń úndeýinde jahandy jailaǵan koronavirýs infektsiiasymen kúresýde dárigerler men meditsina qyzmetkerlerine úlken senim artyp otyrǵandyǵyn aitqan edi. Osy rette, Prezidenttiń tapsyrmasymen koronvirýs infektsiiasyna qarsy kúrestiń aldyńǵy leginde júrgen meditsina salasynyń qyzmetkerlerine ústemeaqynyń tólenýi olardyń jaýapkershiligin arttyp, odan saiyn jigerlendire túsedi», - deidi Lázzat Bilálova.
Joǵary sanatty, 25 jyldyq tájiribesi bar Lázzat Bilálova qazirgi kezde, Aqmola oblystyq kópbeiindi aýrýhanasy janyndaǵy provizorlyq stantsionarda aǵa medbike bolyp qyzmet isteýde. Atalmysh provizorlyq stantsionarda barlyǵy 36 adam karantinde jatyr. Olarǵa dáriger, medbike, sanitary bar 30-dan astam meditsinalyq qyzmetker qyzmet kórsetýde. Onyń úiine barmai, osyndai jumys istep jatqanyna úsh aptadai bolypty.
«Árine, otbasymdy saǵyndym. Bir qalada tursaq ta jaqyndarymmen telefon arqyly beinebailanys arqyly sóilesemiz. Eń bastysy saǵynysh emes, dertti jeńip, adamdardyń tezirek saýyǵyp ketýi. Bizderge memleket, basshylyq tarapynan barlyq jaǵdai jasalyp otyr. Oblystyq aýrýhananyń janyndaǵy jataqhanada turyp jatyrmyz. Meditsinalyq qural-jabdyqtarmen qamtamasyz etti. Osydan birer kún buryn 400 myń teńge shamasynda ústemeaqy aldyq. Sondyqtan esh alańsyz qyzmetimizdi atqarýdamyz», - dep tolyqtyrdy Lázzat Bilálova.
Aita keteiik, osyǵan deiin habarlaǵanymyzdai, Aqmola oblysynda 500-den astam dáriger ústemeaqy alǵan bolatyn.
