QR Indýstriia jáne infraqurylymdyq damý ministrligi Azamattyq aviatsiia komiteti ushqyshsyz apparattardy esepke qoiýdyń tártibin túsindirdi, dep habarlaidy "Ult aqparat".
«Qazaqstannyń aviatsiia ákimshiligi ushqyshsyz ushaqtardy esepke alýdy Qazaqstan Respýblikasynyń azamattyq áýe kemelerin jáne olarǵa quqyqtardy memlekettik tirkeý qaǵidalary boiynsha júrgizedi. Maksimaldy ushý massasy 1,5 keliden asatyn pilotsyz ushý apparattary, sondai-aq maksimaldy ushý massasy 0,25 keliden asatyn «erekshe» sanattaǵy operatsiialardy oryndaityn pilotsyz ushý apparattary esepke alýǵa jatady», - dep jazady komitet mamandary.
Pilotsyz apparatty satyp alýshylar ony esepke qoiý úshin tiisti qujattarmen birge ótinish beredi. Keiin quzyrly organ 5 jylǵa nemese apparatty jaldaý shartynyń merzimi aiaqtalǵanǵa deiin esepke qoiý týraly kýálik beredi.
«Pilotsyz ushý apparatyn esepten shyǵarý da osy tártippen iske asady. Usynylǵan qujattar sáikes kelgen jaǵdaida Qazaqstannyń aviatsiia ákimshiligi ótinish berýshige apparatty esepten shyǵarý týraly kýálik beredi. Esepke alý jáne shyǵarýǵa 30 jumys kúni bólingen. Esepke qoiý týraly kýálikti berýden bas tartý ótinim kelip túsken kúnnen bastap 15 jumys kúni ishinde jazbasha túrde júzege asyrylady», - dep jazady komitettiń baspasóz qyzmeti.
Mundai apparat ieleri anyqtalǵan kemshilikti joiyp, Qazaqstannyń aviatsiia ákimshiligine qaita júgine alady.
Qujattardy Nur-Sultan qalasy, Máńgilik el dańǵyly 55/15, S2.3 blogy mekenjaiyna nemese frontoffice@caakz.com poshtasyna jiberýge bolady.
Eske salsaq, biyl qańtar aiynda Qazaqstan Respýblikasynyń áýe keńistiginde pilotsyz ushý apparattaryn paidalaný qaǵidalary bekitilgen bolatyn. Sodan beri búginge deiin elimizde 279 pilotsyz ushý apparaty esepke alynypty.
