Almaty túbinde apatqa ushyraǵan ushaqtyń qara jáshigindegi málimetterdi tarqatý úshin gollandyq sarapshy keldi. Bul týraly QR Ishki ister ministri Erlan Turǵymbaev aitty, dep habarlaidy QazAqparat.
«Qazirgi ýaqytta birneshe halyqaralyq sarapshy keldi. Qara jáshik alynyp, áýe apattaryn tergeý jónindegi halyqaralyq uiymǵa jiberildi. Sonymen qatar Niderlandydan shyǵarýshy zaýyt ókilderi de kelgen bolatyn», - dedi ministr Úkimet otyrysynan keiin BAQ ókilderine bergen suhbatynda.
Ushaq apatynyń negizgi 3 nusqasyn aitqan ministr oqiǵanyń shynaiy sebebin naqty ataý úshin ýaqyt qajet ekenin de eskertip ótti.
«Áýe kemesi tehnikalyq turǵyda óte kúrdeli ekenin ózderińiz de jaqsy bilesizder. Sondyqtan qysqa ǵana ýaqyttyń ishinde nátije kútý, apattyń sebepteri týraly aitý múmkin emes. Sol sebepti birqatar keshendi tehnikalyq saraptama taǵaiyndalyp otyr» - dedi ol.
Onyń túsindirýinshe, órt-tehnikalyq, aviatsiialyq jáne meditsinalyq saraptamalar júrgiziledi.
«Osy saraptamalardyń qorytyndysy boiynsha atalǵan áýe kemesinde qandai jaǵdai oryn alǵanyna baǵa beriledi. Ázirshe baby sol kúiinde qalyp otyr. Ol - QR Qylmystyq kodeksiniń 344-babynyń 3 tarmaǵy», - dedi Erlan Turǵymbaev.
