Almaty qalalyq qoǵamdyq densaýlyq saqtaý basqarmasynyń bastyǵy Nariman Tabynbaev áýe apatynda jaraqat alǵan UQK qyzmetkerleriniń jaǵdaiy týraly aitty, dep habarlaidy "Ult aqparat".
Nariman Tabynbaev 13 naýryzda bolǵan áýe apatynan zardap shekken eki adam №4 qalalyq klinikalyq aýrýhanaǵa saǵat 18: 05-te óte aýyr jaǵdaida túskenin aitty.
«1990 jyly týǵan naýqastyń diagnozy: aralas jaraqat, bassúiek-midyń jabyq jaraqaty, keýde qýysynyń kóptegen synýy, aiaqtyń synýy, ish jaraqaty, ókpeniń jaraqattanýy jáne 15% kúiik shalý. Aýrýhanaǵa túsken alǵashqy minýttan bastap ol shokqa qarsy sharalar qabyldady. Barlyq kúsh jaǵdaiyn turaqtandyrýǵa baǵyttaldy. Synǵan aiaǵyna jedel hirýrgiialyq operatsiia jasaldy. Ekinshi naýqas 1996 jyly týǵan. Oǵanda túrli dene jaraqaty diagnozy qoiyldy. Bassúiek-midyń jabyq jaraqaty, onyń omyrtqasy synǵan. Ekeýi de bilikti mamandardyń baqylaýynda», - dedi Nariman Tabynbaev.
Onyń aitýynsha, olardyń ómirine tóngen qaýip seiildi.
«Desekte úlken jaraqat bar ekenin túsinýimiz kerek. Sondai-aq, asqyndyratyn faktor bar – ol kúiik jaraqattary. Olardyń ózindik kezeńderi bar. Sondyqtan, biz múmkin asqynýlardan qorqamyz. Bizdiń barlyq mamandardy jumyldyrdyq. Atap aitsam, reanimatologtar, travmatologtar, hirýrgter. Biz olardyń ómirin saqtap qalý úshin kúresemiz. Qazir syrttan maman shaqyrýdyń qajeti joq. Bizdiń naýqastardyń jaǵdaiy turaqtalady dep senemiz», - dedi spiker.
Eske sala keteiik, 13 naýryz kúni Nur-Sultan-Almaty baǵytyndaǵy AN-26 áskeri ushaǵy radardan joǵalyp, Almaty áýejaiy mańynda apatqa ushyraǵan edi.
Ushaqta bolǵan 4 adam qaza tapty, 2 adam túrli jaraqatpen Almaty qalasynyń №4 qalalyq klinikalyq aýrýhanasyna jetkizildi.
Ushaq apaty bolǵan jerge qala ákimi Baqytjan Saǵyntaev baryp, zardap shekkenderge barynsha kómek kórsetýdi tapsyrdy.
Sonymen qatar, Memleket basshysy áýe apatynyń sebepterin anyqtaýdy tapsyrǵan bolatyn.
Qazaqstan Respýblikasy Ulttyq qaýipsizdik komiteti Almatyda apatqa ushyraǵan ushaqtyń qara jáshigindegi derekter tekserilip jatqandyǵyn málim etti.
