Pavlodar qalasyndaǵy shekara qyzmeti №2033 áskeri bóliminiń qarjy bóliminiń bastyǵy men áriptesteri 126,5 mln teńge jymqyrǵany úshin bas bostandyǵynan aiyryldy, dep habarlaidy QazAqparat.
QR Sybailas jemqorlyqqa qarsy is-qimyl agenttiginiń asa mańyzdy ister jónindegi tergeýshisi Qaisar Barjaqsynov Antikor aqparat alańynda osylai dep málim etti.
«2021 jylǵy 27 qyrkúiekte Semei garnizony áskeri sotynyń úkimimen biýdjet qarajatyn jymqyrǵany úshin Pavlodar qalasynda ornalasqan shekara qyzmetiniń 2033 áskeri bólimi qarjy bóliminiń bastyǵy, maior Jýanyshbaev 10 jyl merzimge bas bostandyǵynan aiyryldy. Osy úkimmen qarjy bólimi bastyǵynyń aǵa kómekshisi, aǵa leitenant Bigeldinov 8 jylǵa bas bostandyǵynan aiyryldy. Sondai-aq, qarjy bóliminiń býhgalteri Esentaeva 4 jylǵa sottaldy», - dedi agenttiktiń asa mańyzdy ister jónindegi tergeýshisi.
Onyń sózinshe, kúdiktiler úsh jyldyń ishinde áskerilerdiń turmys jáne issapar shyǵyndaryna dep bólingen 126,5 mln teńgeni jymqyrǵan.
«Atalǵan adamdar 2015-2018 jyldar aralyǵynda áskeri qyzmetshilerdi turmys shyǵyndary men issapar shyǵystaryn esepteý jáne olardy keiinnen berý arqyly jalpy somasy 126,5 mln teńge biýdjet qarajatyn jymqyrdy dep aiyptalǵan. Jýanyshbaev pen Bigeldinov ómir boiy memlekettik qyzmette qyzmet atqarý quqyǵynan, sondai-aq áskeri ataqtarynan aiyryldy. Esentaeva 8 jyl merzimge materialdyq jaýapkershilikke bailanysty qyzmetpen ainalysý quqyǵynan aiyryldy. Úkim zańdy kúshine engen joq», - dedi Qaisar Barjaqsynov.
