Biyl 3 myń jalpy praktika dárigeri biliktilik arttyrý kýrstaryna jiberiledi. Bul týraly Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabyna aitylǵan, dep habarlaidy QazAqparat.
Vitse-premer jaýabynda Qazaqstan boiynsha rezidentýrada kadrlar daiarlaýǵa oblystyq densaýlyq saqtaý basqarmalary bergen 1 656 ótiniminiń 1 500-i qanaǵattandyrylǵanyn atap ótedi. Al dárigerlik kadrlar teńgerimsizdigi barynsha joǵary óńirlerde olardyń qajettiligi tolyq derlik jabyldy.
«Máselen, Aqmola oblysy boiynsha 257 mamanǵa degen qajettilikti, bilim jáne ǵylym uiymdaryna olardyń óńirlik ornalasýyn eskere otyryp, 2021-2022 oqý jylyna memlekettik bilim berý tapsyrysy boiynsha 216 oryn nemese qajettiliktiń 84 paiyzy bólindi. Qostanai oblysynda óńirge ótinim bergen kezde 250 mamanǵa rezidentýrada 233 oryn nemese qajettiliktiń 93 paiyzy ornalastyryldy», - dedi Eraly Toǵjanov.
Sonymen qatar ol 2021 jylǵy 12 qazanda Úkimettiń qaýlysymen «Deni saý ult» árbir azamat úshin sapaly jáne qoljetimdi densaýlyq saqtaý» ulttyq jobasy bekitilgenin atap ótedi.
«Onda meditsina kadrlaryn, onyń ishinde arnaiy jáne tapshy mamandyqtardy daiarlaýǵa arnalǵan granttardyń sanyn 2021 jylǵa bólingen 1500-den 2025 jyly 2000-ǵa deiin ulǵaitý josparlandy. 2021 jyly 3000 jalpy praktika dárigerlerin (2020 jyly – 2525 adam oqytyldy) biliktiligin arttyrý kýrstaryna jiberý josparlandy», - dedi Úkimet basshysynyń orynbasary.
