Sýret: Tengrinews.kz©
Almatyda 28 jastaǵy áiel úsh balasymen turǵyn úidiń 9-qabatynan sekirip qaza boldy. Kýágerler oqiǵa qalai bolǵanyn aityp berdi, - dep habarlaidy Tengrinews.kz tilshisi.
Qaiǵyly oqiǵa Almatydaǵy turǵyn úilerdiń birinde boldy. Marqummen kórshi turǵan er adam oqiǵa týraly aityp berdi.
"Men oqiǵany kórmedim, biraq kórshiler áiel aldymen úsh balany terezeden laqtyryp, keiin ózi sekirgenin aitty. Men bul otbasymen is júzinde sóilesken emespin, olarmen amandaspaimyz da. Óz aldyna júrgen otbasy. 8-shi qabattaǵy kórshim olardyń ústinen shaǵymdanyp júretinin biletinmin", - dedi er adam.
Áieldiń taǵy bir kórshisi qaiǵyly oqiǵa kúndizgi birler shamasynda bolǵanyn aitty.
"Úsh pen jeti jas aralyǵyndaǵy úsh bala jerde jatty. Dárigerler olardyń ómirin saqtap qalýǵa tyrysty, ókinishke qarai, ekeýi sol jerde qaza boldy. Balalar jalańash boldy, tipti olardyń bireýinde shalbary da bolmady. Muny kórgende júregim aýyrdy. Ata-ana balasynyń ómirine osylai qaraýy sumdyq", - deidi oqiǵa kýágeri Nazar Refan.
Tómendegi qabatta turatyn áiel de kórshisimen múlde aralaspaǵanyn aitty.
"Olardy shynymen, eshkim tanymaityn. Osyndai jas kelinshek ómirden ótkeni ókinishti", - deidi ol.
Buǵan deiin Almatyda áiel kishkentai úsh balasymen 9-qabattan sekirip ketkeni habarlanǵan bolatyn. Oqiǵa ornynda áiel men eki bala qaza tapty. Jedel járdem kóliginde taǵy bir bala qaitys boldy.
