Foto: medicalbusinesschool.com
Kókshetaýda ótken jyldyń tamyz aiynda Astana – Petropavl tasjolynda bolǵan jantúrshigerlik jol apatyna qatysty sot úkimi shyqty. Úsh adamnan turatyn bir otbasynyń ómirin qiǵan qaiǵyly oqiǵaǵa kináli júrgizýshi bes jylǵa bas bostandyǵynan aiyryldy, dep habarlaidy Ult.kz KTK arnasyna silteme jasap.
Sot málimetinshe, aiyptalýshy kólikti saǵatyna 100 shaqyrymnan joǵary jyldamdyqpen basqarǵan. Onyń ústine, rólde otyryp uialy telefonǵa alańdaǵany anyqtaldy. Sondai-aq, ol taksidi mindetti saqtandyrý polisinsiz júrgizgen.
Qaiǵyly oqiǵa Shýchinsk mańyndaǵy tasjolda bolǵan. Hyundai Elantra kóliginiń júrgizýshisi joǵary jyldamdyqpen basyp ozbaq bolyp, qarsy jolaqqa shyǵyp ketken. Sonyń saldarynan VAZ-2107 kóligimen betpe-bet soqtyǵysqan. Apat saldarynan VAZ-2107 júrgizýshisi men eki jolaýshysy oqiǵa ornynda kóz jumdy. Taǵy bir adam aýrýhanada qaitys boldy. Al sheteldik kóliktiń jolaýshylary túrli jaraqatpen meditsinalyq kómekke júgindi.
Telearna málimetinshe, qaza tapqan júrgizýshi úsh balanyń ákesi bolǵan jáne olardy jalǵyz ózi tárbielep otyrǵan. Oqiǵa kezinde onyń janynda uly men qaryndasy bolǵan.
Sot úkimine sáikes, sottalǵan azamat marqumdardyń árqaisysy úshin 5-ten 8 million teńgege deiin moraldyq ótemaqy tóleýge mindetteldi.
