Qańtar oqiǵalary kezeńinde urlanǵan 846 qarý tabyldy. Bul týraly QR Bas prokýratýrasy Qylmystyq qýdalaý qyzmeti basshysynyń orynbasary Eldos Qilymjanov málim etti, dep habarlaidy QazAqparat.
«Urlanǵan atys qarýlaryn anyqtaý jumystary belsendi júrgizilip jatyr. Shymkent qalasynda Ulttyq qaýipsizdik komiteti organdary Ishki ister ministrligimen birlesip, jedel-izdestirý is-sharalaryn júrgizdi. Osy oraida Túrkistan oblysynyń 2 turǵyny ustaldy. Olardan «Kamerad» ańshylyq dúkeninen urlanǵan eki «Saiga-12» karabini men pnevmatikalyq myltyq tabyldy», - dedi Eldos Qilymjanov Ortalyq kommýnikatsiialar qyzmetinde.
Sonymen qatar ol Tarazda qarý saqtalǵan «qoima» tabylǵanyn aitty. Odan Jambyl oblysy politsiia departamentinen urlanǵan 1 «Kalashnikov» avtomaty, 2 «Makarov» tapanshasy, «SHTURM» shabýyl myltyǵy, 1 granata jáne oq-dáriler tárkilendi.
«Jalpy, el boiynsha quqyq qorǵaý organdary qańtar oqiǵalary kezeńinde urlanǵan 846 oiyq jáne tegis uńǵyly qarýdy tapty. Urlanǵan qarýdyń 2 myńnan astamy áli de qylmyskerlerdiń qolynda ekenin, bul óz kezeginde qaýip tóndiretinin atap ótken jón. Osy rette zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrǵan adamdar qylmystyq jaýaptylyqtan bosatylady. Degenmen, olardyń áreketterinde ózge de qylmys quramy bolmaýy tiis. Al adamdy quqyq qorǵaý organdary qarýmen ustap alǵan jaǵdailar erikti túrde tapsyrý dep tanylmaidy», - dedi Bas prokýratýra ókili.
Budan buryn habarlanǵandai, qazirgi kezde arnaiy prokýrorlardyń is júrgizýinde jappai tártipsizdikter boiynsha 53 jáne terrorizm aktilerine qatysty 32 qylmystyq is bar.
Memlekettik obektilerdi órtteý, múlikterdi joiý jáne terrorizm aktileri Almaty, Shymkent qalalarynda, Aqtóbe, Atyraý, Almaty, Jambyl, Qyzylorda jáne Shyǵys Qazaqstan oblystarynda jasalǵany belgili boldy.
