17 aimaqta qalyptasqan ýniversitetter bar. Solardyń bazasynda bilim berý institýttaryn qurý kerek. Bul týraly Ortalyq kommýnikatsiialar qyzmetinde ótken brifingte QR JOO Rektorlar keńesi tóraǵasy Erlan Sydyqov aitty, dep habarlaidy QazAqparat.
«Elimizde ýniversitetter kóp. 18 million halqy bar elge eki jerdiń birinde kópsalaly ýniversitet ashý ońai emes. Osy turǵyda joǵary oqý oryndaryn beiimdeý máselesin alǵa qoiyp otyrmyz. Oqý baǵdarlamasy ekonomikanyń ár salasyna qarai negizdelgen, baǵyttalǵan, sol saladaǵy jumys berýshilermen tikelei bailanystaǵy joǵary oqý oryndary bolsa - bul naryqqa tótep beretin joǵary oqý oryndary bolary sózsiz», - deidi Erlan Sydyqov.
Ol osy másele aiasynda pedagogikalyq mamandar ázirleý kerektigin alǵa tartady.
«Taiaýda ótken Úkimet múshelerimen ótkizilgen jiynda Prezident Qasym-Jomart Kemeluly da pedagogikalyq mamandar men institýttardy tártipke keltirý kerek ekenin aitty. Tártipke keltirýdiń birden bir joly retinde QR Bilim jáne ǵylym ministrligi óz usynysyn aitty. 17 aimaqta qalyptasqan ýniversitetter bar. Solardyń bazasynda pedagogikalyq institýttar quryp, onyń basshysy fakýltet emes, institýt direktory jáne sol ýniversitet rektorynyń orynbasary bolyp qyzmet atqarsa jańa baza salýdyń qajeti bolmas edi. 17 aimaqtyń bárine pedagogikalyq mamandar birdei kerek. Pedagogikalyq institýt bir jerde ashyp, ekinshi jerde ashpaýǵa bolmaidy. Al barlyq aimaqqa birdei pedagogikalyq institýt salyp berý múmkindigi joq. Sol sebepti, joǵaryda atap ótkendei, ýniversitetterdiń qalyptasqan bazasynda bul mamandardy daiyndaýǵa bolady. Bul máselede jergilikti bilik belsendilik kórsetýi kerek, sebebi muǵalimder jergilikti jerlerge kerek. Kei óńirde 300-den bastap 1000-ǵa deiin mektep bar. Ol mektepterge jylyna 2 muǵalim barady dep eseptesek, 1000 mektepke 2 myń muǵalim kerek degen sóz. Osyny retteý úshin QR Bilim jáne ǵylym ministrligi júieli jumysyn bastap ketti», - deidi ol.
