2017 jyldyń 10 qańtary - Almatyda Air Astana áýekompaniiasynyń ókilderi Qysqy ýniversiadanyń «Alaý saqtaýshylaryna» arnap oqý seminaryn ótkizdi. Tehnikalyq mamandardan quralǵan arnaiy top Ýniversiada alaýyn saqtaityn kolbany estafeta kezinde búkil Qazaqstan arqyly tasymaldaýǵa kómektesetin bolady.
Osy seminar alaý saqtaityn kolbany ushaqpen qaýipsiz tasymaldaý joldaryna arnaldy. Top músheleri ushaqpen tasymaldaý kezinde jolaýshylar salonynda arnaiy quraldar kómegimen kolbany qalai durys bekitý qajet, tótenshe oqiǵalar kezinde qandai qadamdar jasaý kerek ekenin úirendi. Seminardy ótkizý úshin Air Astana kompaniiasy ushaq salonyna uqsatyp salynǵan arnaiy bólmeni usyndy.
Ýniversiada alaýy arnaiy kolbada nemese «Devi shamynda» tasymaldanady. Devi shamy 19 ǵasyrda Anliiada jasap shyǵarylyp, shahtada jumys jasaý kezinde qoldanylǵan. Qazirgi zamanǵy Devi shamynyń jezden jasalynǵan berik metall korpýsy, otynǵa arnalǵan germetikalyq bóligi jáne otqa janbaityn shynysy bolady. Shamnyń joǵarǵy bóliginde gaz shyǵyp ketken jaǵdaida ottyń taralýyna jol bermeitin arnaiy tor ornatylǵan. Osy sham kómegimen 2014 jyly Sochide ótken Qysqy olimpiadanyń alaýy tasymaldanǵan bolatyn.
«Qazaqstannyń árbir óńirine jáne Astana qalasyna biz osyndai shamnyń bireýin jiberemiz, onyń kómegimen Ýniversiada alaýyn Almatyǵa jetkizemiz. Alaý óńirlerde tutatylady, Ýniversiadanyń ashylý saltanatyn osy alaýmen ótkizemiz», - dedi Almatydaǵy 28-shi Dúniejúzilik qysqy ýniversiada alaý estafetasynyń tehnikalyq mamany Sergei Viard.
Ýniversiada «Alaý saqtaýshylary» - arnaiy irikteýden jáne daiyndyqtan ótken, estafeta kezinde Ýniversiada alaýyn tasymaldap, onymen ilese júretin top. Ótkizilgen seminarǵa 15 adam qatysty, olardyń árqaisysy alaý estafetasyn ótkizý úshin Qazaqstannyń túrli aimaqtaryna jiberiledi. «Alaý saqtaýshylar» tobyna sportpen shuǵyldanatyn ártúrli ýniversitetterdiń stýdentteri kirdi.
Árbir oblys ortalyǵy, Astana jáne Almaty qalalary aimaqtaǵy eń iri joǵarǵy oqý ornynda Alaýdy tutatýǵa arnalǵan óz saltanatyn ótkizetini belgili. Óńirdiń eń úzdik stýdenti alaýdy Almatyǵa jetkizip, Ýniversiadanyń ashylý saltanatynyń sharyqtaý sátinde 16 oblystan ákelingen alaýdyń barlyǵy bir ýaqytta biriktiriletin bolady.
Aita ketsek, 28-shi Búkilálemdik qysqy ýniversiada 2017 jyldyń 29 qańtarynan bastap 8 aqpany aralyǵynda Almatyda ótedi. Qysqy ýniversiada baǵdarlamasyna mánerlep syrǵanaý, short-trek, taý shańǵysy, snoýbord, biatlon, shańǵymen jarysý, shaibaly hokkei (áielder men erler arasyndaǵy), kerling, shańǵymen tramlinnen sekirý, shańǵy qossaiysy, konkimen júgirý sporty, fristail sekildi 12 sport túri kirgen. Jarystarǵa 2 myńǵa jýyq sportshy qatysady dep kútilýde. Ýniversiada ótkiziletin ýaqytta 3 myń erikti, onyń ishinde sheteldik eriktiler atsalysady.Stýdentter arasyndaǵy sport oiyndaryna 30 myńǵa jýyq otandyq jáne sheteldik týrist keledi dep kútilýde. Saiystardy álemniń 80 elindegi 1 mlrd. adam teledidar arqyly tamashalamaq.
"Ult aqparat"
