Koronavirýs indetine bailanysty mektepter jumysy toqtaǵan shaqta álemde balalardyń úshten bir bóligi iaǵni, 463 million oqýshynyń qashyqtan oqýǵa múmkindigi bolmaǵan. BUU-nyń balalar qory UNICEF-tiń 27 tamyzda jariialaǵan esebinde osyndai málimet aitylady.
“Koronavirýs indetine bailanysty mektebi jabylǵan keminde 463 million balanyń qashyqtan oqýǵa múmkindigi bolmaǵan. Osynshama balanyń ailar boiy qajetti dárejede bilim ala almaýy – bul bilim salasyndaǵy tótenshe jaǵdai. Onyń saldary jyldar boiy ekonomika men qoǵamda seziletin bolady” delingen uiym esebinde.
Unicef málimetinshe, kóktem jáne jaz ailarynda koronavirýsqa bailanysty karantin jariialanyp, ózge mekemelermen qatar mekteptiń de jabylýy álemde 1,5 milliard oqýshynyń bilim alýyna áser etken. Uiym esebinde qashyqtan oqýdyń shekteýli tustaryp atap ótip, bilim alýdaǵy teńsizdiktiń "tereńdegenin" ashyp kórsetken.
Esepte sonymen birge shamamen 100 eldegi balalardyń úiden bilim alýǵa múmkindigi bar-joǵy týraly derek jinaqtalǵan. Balalardyń teledidar, radio, internet, túrli platformalardy paidalaný múmkindigi jaily málimet bar.
Qazaqstanda 1 qyrkúiekte alǵashqy qońyraý onlain formatta ótedi. Indetke bailanysty biyl tek bastaýysh synyp oqýshylary ǵana ata-analary ruqsat bergen jaǵdaida mektepke bara alady. Qalǵan synyptar qashyqtan oqidy. Shalǵaidaǵy keibir shaǵyn mektep oqýshylary dástúrli formatta oqidy.
Buǵan deiin bilim jáne ǵylym ministrligi elde jarty millionǵa jýyq balanyń internetke qosylmaǵanyn, 185 myńnan astam oqýshyda qajetti qurylǵy joq ekenin aitqan.
Biyl kóktemde internet jyldamdyǵynyń tómen bolýy, mektepterdiń tehnikalyq turǵyda jabdyqtalmaýy, muǵalimder men oqýshylardyń qashyqtan oqýǵa daiyn emestigi siiaqty túrli máseleler týyndaǵan. Kóptegen ata-analar balalarynyń onlain oqýǵa múmkindigi joq ekenin aityp shaǵymdanǵan edi.
Jaqynda ministr Ashat Aimaǵambetov "bul máseleler bir kúnde sheshile qoimaidy, shama-sharqynsha kemshilikterdi joiýǵa tyrystyq" dep aitqan.
Resmi málimet boiynsha, Qazaqstanda 3,3 mln oqýshy bar. Biyl jańa oqý jylyn 80 paiyzy (2,6 mln oqýshy) qashyqtan oqýdan bastaidy. 15 paiyzy nemese 530 myń oqýshy úshin kezekshi synyptar uiymdastyrylady. Shaǵyn mektepterde 202 myń bala dástúrli formatta oqymaq.
