Foto: Hindustan Times
Úndistannyń ońtústiginde Air India áýe kompaniiasynyń ushaǵy apatqa ushyrady. Jergilikti Hindustan Times basylymynyń habarlaýynsha, apattan bir jolaýshy aman qalǵan.
Ahmedabadtan Londonǵa ushqan áýe laineri apat saldarynan 290-nan astam adam qaitys boldy dep habarlaidy Reuters. Ushaq bortynda 242 jolaýshy bolǵan, olardyń arasynda Ulybritaniia azamaty, 40 jastaǵy Ramesh Vishvakýmar tiri qaldy. Ol týǵan-týystaryn kórý úshin Úndistanǵa kelgen jáne Ulybritaniiaǵa baýyrymen birge oralmaq bolǵan. Alaida, baýyrynyń taǵdyry belgisiz.
Ramesh 11A ornynda otyrǵanyn, al baýyry janynda bolǵanyn aitty. Qazir ol aýrýhanada em alýda.
"Esimdi jiǵanda ainalamdaǵy máiitter men ushaq qaldyqtaryn kórdim. Shoshyp, qashyp shyqtym. Meni ustap alyp, jedel járdemge otyrǵyzdy," – dep oqiǵany baiandady ol.
Air India málimetine sáikes, ushaq bortynda Úndistannyń 169, Ulybritaniianyń 53, Portýgaliianyń 7 jáne Kanadanyń 1 azamaty bolǵan. Jergilikti bilik apat qurbandarynyń sany ósýi múmkin ekenin aitady, sebebi ushaq turǵyn aýdanǵa, medkolledj jataqhanasynyń ústine qulaǵan.
Qazaqstan prezidenti Qasym-Jomart Toqaev Úndistan premer-ministri Narendra Modige kóńil aityp, qaza bolǵandardyń jaqyndaryna qoldaý bildirdi.
