Úndistannyń Niý-Deli qalasynda ál-Farabi atyndaǵy qazaq-úndi ǵylymi-bilim jáne mádeni ortalyǵy ashyldy. Bul týraly SIM baspasóz qyzmeti habarlady.
Joba ál-Farabi atyndaǵy Qazaq ulttyq ýniversiteti jáne Qazaqstannyń Úndistandaǵy Elshiliginiń qoldaýymen júzege asyryldy.
Ortalyqtyń ashylýy 2020 jyly IýNESKO-nyń qoldaýymen keń kólemde atalyp ótiletin ál-Farabidiń 1150 jyldyǵyna arnalyp otyr.
Ál-Farabidiń murasy ǵylymnyń barlyq derlik salalaryn qamtidy. Onyń ǵylymdy júielep jikteýi álemdik ǵylymi oidyń odan ary damýyna óz áserin tigizdi. Onyń eńbekteri Eýropada XII-XIII ǵǵ. latyn jáne ivrit tilderine aýdaryla bastaldy, al 1930-1932 jj. Parij qalasynda «Mýzyka týraly úlken kitabiniń» birinshi bóliminiń frantsýz tilindegi aýdarmasy basylyp shyqty.
Ál-Farabi esimi álemniń ǵylym jáne mádeniet tarihyna berik endi. Onyń shyǵarmashylyq qyzmeti Eýropa mádenietiniń renessansyna úlken áserin tigizip, eńbekteri Batys pen Shyǵysty bailanystyratyn rýhani kópirge ainaldy.
Elshi Bolat Sársenbaev «ál-Farabi úii Qazaqstannyń tarihy men mádenietin tanýdy qalaityn jandarǵa ashyldy. Ortalyqtyń qyzmeti mádeniet dialogynyń damýy jáne Qazaqstan men Úndistan arasyndaǵy áriptestiktiń odan ári nyǵaiýyna septigin tigizedi», - dep atap ótti.
Sondai-aq, Ortalyq stýdentterge Qazaqstandaǵy bilim berý júiesi, stýdentter arasyndaǵy almasý baǵdarlamalary týraly tolyq aqparat berip, Qazaqstanda oqyǵysy keletinderge qajetti keńester beretindigi Ortalyq direktory doktor Mir Hýsein atap ótti.
«Ál-Farabi úiiniń» ashylý saltanatyna úkimettiń, biznes jáne qoǵamdyq toptardyń, ǵylymi-zertteý institýttary men ǵylymi ortalyqtardyń jáne úndistandyq BAQ ókilderi qatysty. Is-sharanyń qurmetti qonaǵy Úndistannyń Jastar isi jáne sport jónindegi memlekettik ministri Kiren Ridjidjý myrza boldy.
Shyǵystyń ǵulama oishyly Ábý Nasyr ál-Farabi 870 jyly búginde Otyrar atalatyn, Farab qalasynda dúniege keldi (qazirgi Ońtústik Qazaqstan oblysyndaǵy). Otyrar qalasy IX-H ǵ. tarihi qatynastar men Uly Jibek jolynyń torabyndaǵy asa iri saiasi, mádeniet jáne saýda ortalyǵy bolǵan.
