Búgin Jezqazǵan qalasynda brakonerlerdiń qolynan qaza tapqan qoryqshy Qanysh Nurtazinovty sońǵy saparǵa shyǵaryp saldy. Bul týraly Qaraǵandy oblysy ákimdiginiń baspasóz qyzmeti habarlady.
Qaraqshylardyń oǵy ómirin qiǵan tabiǵat qorǵaýshysymen qoshtasýǵa marqumnyń týystary men dostary, áriptesteri, jerlesteri jinaldy. Qanyshty aqtyq saparǵa shyǵaryp salý kezinde jinalǵan qaýym ol ádilettilik pen zańdy árdaiym alǵa qoiǵan erjúrek jan bolǵanyn aitty.
«Elbasy men Prezident atynan, barlyq qazaqstandyqtardyń atynan Qanysh Nurtazinovtyń týǵan-týystary men jaqyndaryna kóńil aitamyn. Memleket basshysy osy qaiǵyly oqiǵany bilgennen bette qylmystyq isti tergeýdi jeke baqylaýǵa alyp, ishki ister ministrine tiisti tapsyrmalar berdi. Qanysh bizge Otanǵa degen batyldyq pen adaldyq, qyzmettik boryshyn oryndaý kezindegi janqiiarlyq úlgisin kórsetti. Biz ekologiia ministri Maǵzum Myrzaǵalievpen birge osy qaiǵyǵa barlyǵyńyzben birge ortaqtasý úshin keldik», - dedi Qaraǵandy oblysynyń ákimi Erlan Qoshanov.
Memleket basshysynyń Jarlyǵymen Qanysh Nurtazinov qaitys bolǵannan keiin I dárejeli «Aibyn» ordenimen marapattaldy. Prezident atynan oblys ákimi qaza bolǵan qoryqshynyń jubaiyna memlekettik nagradany tabys etti.
Qaza tapqan ańshy inspektordyń otbasy materialdyq kómek alady. Erlan Qoshanov sondai-aq Prezidenttiń tapsyrmasy boiynsha batyrdyń erligi máńgi este qalatynyn aitty. Ulytaý aýdanynda Qanysh Nurtazinovtyń esimi kóshelerdiń birine beriledi.
«Osyǵan orai, Elbasy Nursultan Nazarbaev, prezident Qasym-Jomart Toqaev bul qaiǵyǵa ortaqtasyp, shynaiy kóńil aityp jatyr. Osyndai erminezdi azamat tárbielegen ata-ana, týǵan-týys, januiasyna sheksiz alǵys aitamyz. Artynan qalǵan anasyna, jubaiyna, bes balasyna Alla qýat berip, meiirimin tóge kór deimiz... Qanysh Serikuly qazaq dalasynyń simvoly aqbókenderdi jáne kórkem tabiǵatymyzdy qorǵaýda óziniń qyzmettik mindetin adal oryndap shyqty. Naǵyz erlik kórsetti.... Ókinishke orai, munyń barlyǵyn osyndai jaǵdaida aitýǵa týra kelip tur. Endi barlyǵyna Allanyń qalaýy», - dedi ekologiia, geologiia jáne tabiǵi resýrstar ministri Maǵzum Myrzaǵaliev.
Marqum qoryqshy 43 jasta edi. Áskerden keiin zań bilimin alyp, Qanysh óz ómirin tártipi qorǵaý salasymen bailanystyrǵan. Birneshe jyl týǵan aýylynda ýchaskelik inspektor bolyp jumys istedi. Úsh jyl buryn ishki ister organdarynan otstavkaǵa shyqqannan keiin, tabiǵat qorǵaý qyzmetine aýysqan.
Jerlesiniń qaza bolǵany týraly taraǵan qaiǵyly habar árbir qoskóldiktiń qabyrǵasyn qaiystyrdy. Aýyl turǵyndary ony jeke qaiǵysy retinde qabyldap, Qanyshtyń otbasyn qoldaý úshin birigip, kómekterin aiamady.
«Bizdiń aýyl shaǵyn. Biz bárimiz bir-birimizdi bilemiz. Kanysh keremet, meiirimdi jáne aqjarqyn adam edi. Ony barlyǵymyz qurmetteýshi edik. – Biz Prezident Qasym-Jomart Toqaevqa Qanyshymyzdyń týǵandary jáne aýyldastarymen birge qaiǵymyzǵa ortaqtasyp, kóńil aitqany úshin alǵysymyzdy bildiremiz. Marapattaý týraly sheshim durys jáne ádil dep sanaimyz. Árine, bul ballalar úshin ákesiniń, áieline jubaiynyn ornyn toltyrmaidy. Biraq olardy osy bir aýyr qasiretimen jalǵyz qalmaǵanan kórsetýde. Qoryqshylyq jumys óte qaýipti jáne memleket deńgeiinde adam ómirin qorǵaý úshin sharalar qabyldaý qajet», - deidi Qoskól turǵyny Hamzat Janalinov.
Qoshtasý rásiminen keiin baqilyq bolǵan qoryqshynyń denesin týǵan jerine aparyp jerledi.
Aita keteiik, Aqmola oblysy Jarqaiyń aýdanyn barlaý kezinde "Ohotzooprom" inspektorlaryna shabýyl jasalǵan bolatyn. Saldarynan Nurtazinov Qanysh qaza bolyp, qoryqshynyń artynda tórt balasy qaldy. Ishki ister ministri inspektorlarǵa shabýyl jasaǵan qylmyskerlerdi anyqtaý jáne ustaý úshin elimiz boiynsha «Ustaý» jospary jariialanǵanyn habarlady. Qazaqstan prezidenti Qasym-Jomart Toqaev pen QR ekologiia, geologiia jáne tabiǵi resýrstar ministri Maǵzum Myrzaǵaliev qaza tapqan inspektordyń týystaryna kóńil aitty. Memleket basshysy qaza tapqan qoryqshynyń otbasyna kómek kórsetiletindigin atap ótti. Memleket basshysy qyzmettik boryshyn atqarý kezinde kórsetken erligi úshin Nurtazinov Qanysh Serikuly men Ospanov Samat Qoshbergenulyn ordendermen nagradtaǵan edi.
