Qazaqstan Jazýshylar odaǵynyń tóraǵasy, Memlekettik syilyqtyń laýreaty, aqyn Ulyqbek Esdáýlet Prezident Qasym-Jomart Toqaevtyń Joldaýynda aitqan bastamalarǵa pikir bildirdi, dep habarlaidy QazAqparat.
Qalamgerdiń aitýynsha, Memleket basshysynyń biylǵy Joldaýy qoǵamdaǵy ózekti máselelerdi dóp basyp aitýymen erekshelendi. Onyń ishinde mádeniet, til men ádebiet te bar.
«Prezident óz Joldaýynda bolashaǵyn Otanymyzben bailanystyratyn árbir azamat qazaq tilin úirenýge den qoiýy kerek dedi. Bul otanshyldyqtyń basty belgisi dep qadap aitty. Ol - aqiqat. Súbeli sóz astaryna úńilsek, úlken másele jatyr. Ókinishke orai, bizde qyzmette júrgen, bilikte júrgen adamdardyń ishinde qazaq tilin úirenýge den qoimai júrgender barshylyq. Sondyqtan meniń oiymsha, memlekettik tildi úirenýge yqpal etetin amal-ádis, tipti mehanizm tetigin taýyp, qoldaný kerek. "Memlekettik tildi bilmeitin tulǵa memlekettik qyzmetke qabyldanbaidy" degen siiaqty nárselerdi engizý kerek shyǵar. Sol kezde tilge degen qurmet arta túsedi dep oilaimyn» - deidi aqyn.
Sondai-aq, Jazýshylar odaǵynyń tóraǵasy daryndy jastardy qoldaýǵa qatysty pikir bildirdi.
«Prezident jas ári daryndy músinshiler, sýretshiler, teatr qyzmetkerleri, mýzykanttar, qalamgerler jańa janr túrlerin igerip, udaiy izdenis ústinde júretinin basa aitty. Osyndai talantty jastardyń tasada qalyp qoiatyny shyndyq. Memleket basshysy tapsyrǵan mindetter oryndalsa, ádebiet pen mádeniet salasy odan ári ilgerilei túsetini sózsiz», - deidi ol.
Ulyqbek Esdáýlet Prezident mádeniet qyzmetkerleri, qoryqshylar, kitaphanashylar, kólik júrgizýshilerdiń jalaqysyn 2022-2025 jyldar aralyǵynda 20 paiyzǵa arttyrýdy tapsyrǵanyn tilge tiek etti.
«Kitpahanashylardyń jalaqysy ósetin boldy. Kitaphana bul úlken sala bile-bilgen adamǵa. Kitaphana - bilim men ǵylym ordasy. Jazýshylardyń týyndysyn saqtaityn, nasihattaityn oryndardyń biri - kitaphana. Shyǵarmany oqyrmanǵa jetkizýshi ol - kitaphanashy. Olardyń eńbegin eskerip, jalaqysyn kóterý óte durys», - dedi spiker.
