Qazaqstandyq ónerpazdar Ulybritaniia jurtshylyǵy aldynda óner kórsetti. Made in KZ toby jáne Aibek Bekbosyn qazaqtyń ulttyq aspaby dombyrany Kembridj qalasynyń halqyna pash etti, dep habarlaidy QazAqparat.
Kembridj ýniversitetiniń Fitsýiliam murajaiynda «Uly dala altyny» kórmesi ashylǵany belgili.
Oǵan Shyǵys Qazaqstan oblysyndaǵy ejelgi saq qorǵandarynan tabylǵan altyn artefaktiler qoiylǵan.
Qazaqstan Táýelsizdiginiń 30 jyldyǵy qurmetine uiymdastyrylǵan sharaǵa otandyq ónerpazdar da óz úlesin qosty.
Aǵylshyn rytsarlarynyń dýlyǵasy men músinderine arnalǵan murajai galereialary bir keshke qazaq óneriniń ordasyna ainaldy.
Qazaqstandyq shyǵarmashylyq ókilderi barshaǵa tanys hit ánder men ulttyq folklordan shashý shashty.
Eýropalyq kórermenniń kóńilin birden baýrap alý úshin aldymen olarǵa tanys, júregine jaqyn áýenderdi qara dombyranyń únimen qazaqi naqyshta jetkizýge tyrysty.
«Tyńdarmanǵa ózimizdiń kaver-nusqalarymyzdy usyndyq. Ol álemdik hit ánderden, onyń ishinde britandyq ánshilerdiń hit ánderinen jáne de árine, ózimizdiń qazaq ánderin, Shámshi Qaldaiaqovtyń, Qurmanǵazy atamyzdyń kúilerinen usyndyq», - deidi Made in KZ tobynyń jetekshisi Baýyrjan Itekeev.
«Biz ándi jandy daýysta, 100 paiyz jandy daýysta oryndaimyz. Óitkeni biz janymyzben, tánimizben sapaly mýzykaǵa basymdyq beremiz», dedi Made in KZ tobynyń ánshisi Nazym Itekeeva.
Made in KZ tobynyń taǵy bir múshesi Jandos Ákimbaevtyń aitýynsha, ónerpazdar dombyranyń únin búkil álemge tanymal etkisi keledi jáne Made in KZ tobyn brendke ainaldyrǵysy bar.
Ónerpazdardyń kontserti ertesine ashyq aspan astynda jalǵasty. Murajai janynan ótip bara jatqan Kembridj qalasynyń turǵyndary kidirip, ásem án men tátti kúilerdi súisine tyńdady. Aialdamaǵa toqtaǵan eki qabatty avtobýstardyń jolaýshylary bolsyn, kóshe tazalap júrgen jumysshylar bolsyn qos ishekti mýzykalyq aspappen jaqynyraq tanysqysy keldi. Uialy telefondaryna túsirip, yrǵaqty mýzykaǵa qosyla bilegender de tabyldy.
«Shyǵarmashylyq aldynda bas ietin, óner dese ishken asyn jerge qoiatyn jergilikti turǵyndar kelip, dombyraǵa qyzyǵýshylyq tanytyp jatyr. Ol degenimiz qazaq jurtynyń armandarynyń biri oryndaldy dep oilaimyn. Qazaqtyń qasietti qara dombyrasy búkil álemdi jaýlasa ol bizdiń maqsatymyzdyń oryndalǵany», - deidi kúishi-kompozitor, Shyǵys Qazaqstan oblystyq filarmoniiasynyń direktory Aibek Bekbosyn.
«Men búgin kórmege kirgim keldi. Biraq halyq óte kóp bolǵandyqtan kirý múmkin bolmady. Onyń ornyna sizderdiń mýzykalaryńyzdy tyńdaý qurmetine ie boldym jáne shynymen de rahat sezimge bólendim. Bul ulttyq dybysty esti otyryp, jańa ǵana internetke jedel kirdim jáne onyń aty dombyra ekenin bildim. Qazir aspapty qolyma ustap otyryp, onyń ǵajap ekenine kózim jetip otyr», dep tyńdarmandardyń biri, zeinetker Nikola Harrison qýanyshyn jasyrmady.
Qazaqtyń tól ónerine tánti bolǵan aǵylshyndar Qazaqstanǵa baryp, Uly dala órkenietin óz kózimen kórgisi keletinderin aityp jatty. Ónerpazdardan shaǵyn sheberlik sabaǵyn alyp, dombyra tartýdy úirendi.
