Ulybritaniia Parlamenti Qaýymdar palatasynda Qazaqstan Respýblikasy Táýelsizdiginiń 30 jyldyǵyna arnalǵan konferentsiia ótti, dep habarlaidy QazAqparat.
Onyń aiasynda elimizdiń táýelsizdik jyldaryndaǵy jetistikteri týraly jazylǵan aǵylshyn tilindegi «Kazakhstan at 30: The Awakening Great Steppe» («Qazaqstannyń 30 jyldyǵy: Jańǵyrǵan Uly Dala») atty jańa kitaptyń tusaýy kesildi.
Kitapta ekonomikalyq damý, investitsiialyq ahýaldy jaqsartý, saiasi reformalar, bilim berý júiesin transformatsiialaý, halyqaralyq arenadaǵy jetistikter, mádeni murany, týrizmdi damytý siiaqty sońǵy úsh onjyldyqta jetken jetistikterge sholý jasalady. 15 esseden turatyn jinaqtyń avtorlary: bedeldi britaniialyq, halyqaralyq jáne qazaqstandyq sarapshylar.
Alǵy sózdi belgili britaniialyq tarihshy, «Jibek joly: Álemniń jańa tarihy» álemdik bestselleriniń avtory, Oksford ýniversitetiniń professory Piter Frankopan jazǵan. Esse avtorlarynyń qatarynda QR Prezidentiniń ekonomikalyq damý máseleleri jónindegi shtattan tys keńesshisi Ser Sýma Chakrabarti, QR Prezidentiniń kómekshisi Erlan Qarin, AQSh Memlekettik hatshysynyń burynǵy kómekshisi Nisha Bisval, Birikken Koroldiktiń burynǵy Memlekettik Qorǵanys ministri Djonatan Aitken, Ulybritaniia Parlamenti Lordtar palatasynyń múshesi jáne Angliia men Ýelstiń burynǵy Joǵarǵy sýdiasy Lord Garri Výlf, kanadalyq sáýlet tarihshysy jáne «Astana: sáýlet, mif jáne taǵdyr» kitabynyń avtory Frenk Albo bar.
Ulybritaniia parlamentiniń depýtaty, Qazaqstanmen yntymaqtastyq jónindegi Jalpypartiialyq parlamenttik toptyń tóraǵasy jáne kitaptaǵy esse avtorlarynyń biri Bob Stiýart quttyqtaý sózinde Qazaqstannyń tarihi ólshem boiynsha qysqa merzim 30 jyl ishinde zor tabystarǵa qol jetkize alǵanyn atap ótti.
«Táýelsizdik jyldarynda elderińiz óziniń memlekettik shekarasyn bekitip, halyqaralyq arenadaǵy bedelin nyǵaita aldy. Jańa ekonomikalyq júieni, áleýmettik salany damytty, álemdik deńgeidegi oqý oryndaryn qurdy, sondai-aq ózine aǵylshyn jalpy quqyǵy qaǵidattaryn basshylyqqa alǵan quqyqtyq júieni qalyptastyrdy», – dedi ol.
Qazaqstannyń Ulybritaniiadaǵy elshisi Erlan Ydyrysov, óz kezeginde, bul biregei kitap refleksiia ispettes – táýelsizdiktiń alǵashqy 30 jylynyń obektivti baǵasy, sondai-aq halyqaralyq jáne qazaqstandyq sarapshylardyń bolashaqqa jańa kózqarasy ekendigin atap ótti.
«Astana» halyqaralyq qarjy ortalyǵy (AHQO) sotynyń tóraǵasy Lord Djonatan Mans AHQO soty men halyqaralyq tórelik ortalyǵyn (HTO) qurýda qol jetkizilgen jetistikteri jáne onyń tiimdi jumysy týraly aityp berdi.
«AHQO soty – bul ortalyqtyń ózi úshin de, onyń qyzmetine júginetin adamdar úshin de zań ústemdigi men biznes-protsesterdiń qaýipsizdigine kepildik berýge arnalǵan innovatsiialyq kásiporyn. Bul sottyń ereksheligi – ol Qazaqstannyń ulttyq quqyqtyq júiesinen tolyǵymen táýelsiz. AHQO Eýraziia júregindegi Britan quqyǵynyń araly», - dep atap ótti ol.
Qazaqstandaǵy bilim berý júiesin damytý týraly esseniń avtory Kembridj ýniversiteti Bilim berý innovatsiialary departamentiniń direktory professor Kollin MakLaflin asa joǵary halyqaralyq standarttar deńgeiinde jumys isteitin Nazarbaev Ýniversitetin, sondai-aq oqytý salasyndaǵy ozyq bilim men tehnologiialar synaqtan ótken eksperimenttik mektepter qurý bastamasye kóregen sheshim dep atap ótti.
«Sońǵy jyldary Qazaqstan uzaq joldy ótkergenine qaramastan, bul protsess áli de jalǵasýda. Osy ýaqyt ishinde sizdiń elińiz oqý baǵdarlamasyn, baǵalaý júiesin, pedagogikany, muǵalimderdiń jumys jaǵdaiyn, sonyń ishinde jalaqyny ózgertti. Qazaqstan da halyqaralyq deńgeide moiyndaldy – qazaqstandyq baǵalaý júiesi alǵash ret álemdik deńgeide tanyldy. Bul keremet jetistikter. Sońǵy 4-5 jyl ishinde bul reformalar pilottyq satydan ótip, búkil el boiynsha engizilip jatyr. Bul odan da kúrdeli jaýapkershilik júkteidi», – dep túiindedi ol.
Basylymnyń redaktory, jýrnalist jáne jazýshy Nik Filding kitaptaǵy esselerdiń avtorlarynyń sarqylmas yntasy men Qazaqstan týraly bilim tereńdigine tánti bolǵanyn atap ótip, tyńdaýshylardy kitapty oqýǵa jáne Uly Dala eline saiahattaýǵa shaqyrdy.
Qazaqstan Táýelsizdiginiń 30 jyldyǵyna orai ótken konferentsiia Britan Parlamenti jinalystar ótkizetin Vestminster saraiynyń tarihi zaldarynyń biri – «Strangers' Dining Room» bólmesinde ótti. Is-sharaǵa 100-den astam qonaq, onyń ishinde belgili parlamentiiler, Birikken Koroldiktiń saiasi, akademiialyq jáne mádeni toptarynyń ókilderi, jýrnalister men sheteldik diplomattar qatysty.
