QR Tótenshe jaǵdailar ministrligi ákimdiktermen birlesip, avtonomdy jylytý júiesi bar úilerge 118 myńnan astam datchik ornatty. Bul týraly QR Tótenshe jaǵdailar ministri Iýrii Ilin aitty, dep habarlaidy QazAqparat.
«Ókinishke orai, órt sanynyń kóbeiýi týraly jaǵymsyz statistikany baiqap otyrmyz. Jalpy elimiz boiynsha 2020 jyldyń tamyz-qyrkúiek ailarynan jylytý maýsymy bastalǵansha ákimdiktermen jáne áleýmettik qorǵaý organdarymen birlesip úilerdi aralap, reid júrgizdik. Munda halyqtyń osal toptary – jalǵyzbasty qarttar, zeinetkerler, kóp balaly otbasylar, qoǵamnan shet qalatyn adamdardy nazarǵa aldyq. Elimiz boiynsha osyndai 118 myń úidi esepke aldyq. Bul úilerdiń barlyǵynda jergilikti atqarýshy organdar men demeýshilerdiń qatysýymen gaz jabdyqtaryn baqylaý datchikteri ornatyldy», - dedi ministr Ortalyq kommýnikatsiialar qyzmetinde ótken brifingte.
Ministrdiń aitýynsha, sensorlardyń jumysy jalpy oń nátije kórsetip otyr.
«Sońǵy eki aida datchikter ornatylǵan úilerde úsh ret dabyl qaǵyldy. Osylaisha, datchikter ondaǵy adamdardyń ómiri men densaýlyǵyn saqtap qaldy», - dedi ministr.
Vedomstvo habaryna sáikes, el boiynsha 2 million 300 turǵyn úi bar.
«Oblys ortalyqtary men qalalarda osyndai 940 myńnan astam úi jáne aýyldyq jerlerde 1 million 414 myń úi bar. Qurylystar bólinisinde aitar bolsaq, 2 million 50 myńnan astam jeke turǵyn úi jáne kópqabatty – 314 myń úi bar. Bizdiń qyzmetkerler áleýmettik qorǵaý organdarymen, ýchaskelik inspektorlarmen birlesip 2 millionǵa jýyq úidi (81%) aralap shyqty. Eń aldymen, avtonomdy jylytý júiesine basa nazar aýdaryldy, 4 millionnan astam azamatqa nusqaý berildi», - dedi Iu.Ilin.
Sonymen birge ministr turǵyndardyń qyzmetkerlerdi jeke úi aýmaǵyna kirgizbeitinin atap ótti. 77,5 myńnan astam úidiń turǵyndary túsindirme jumysyn júrgizetin qaýipsizdik qyzmetkerlerin úige kirgizbegen.
