Qazaqstan Respýblikasy Ulttyq ulanynyń Almaty qalasyndaǵy «Ońtústik» óńirlik qolbasshylyǵy áskeri bólimderiniń jas sarbazdary saltanatty túrde Áskeri ant qabyldady. Shara Almatydaǵy 28 panfilovshylar saiabaǵynda saǵat tańǵy 10.00-de bastalady. Sharada barlyǵy 300-ge tarta jas jaýynger ant beredi.
Rásimdi ashqan 7552 áskeri bóliminiń komandiri podpolkovnik Serik Narymbekov jastardyń jadynda máńgilik qalatyn búgingi jiyn jóninde: «Qurmetti sarbazdar, ant qabyldaý - Otanyńa, halqyńa aqtyq demiń shyqqansha adal bolý, el basyna syn saǵat tússe, onda moiymai kóterý, qajet bolsa, jan qiiý degen sóz. Sondyqtan da eldiń qorǵany ataǵyna sai, antqa berik bolyńyzdar. Talai ǵasyr halqynyń erkindigin syrtqy jaýlardan qorǵaǵan Qabanbai, Bógenbai, Naýryzbai syndy batyr babalarymyzdyń, keshegi fashizmniń otyn óshirgen abzal atalarymyzdyń amanattaǵan Otanymyzdyń táýelsizdigin qyraǵy kúzetińder», - dep aq tilegin arnady.
Jaýyngerlerdiń ant qabyldaý rásimine arnaiy kelgen ata-analar, ardagerler de izgi lebizderin bildirdi.
«Ońtústik» óńirlik qolbasshylyǵynyń ardagagerler keńesiniń tóraǵasy otstavkadaǵy polkovnik Gennadii Faleev: «Erlik ataýlynyń qainary – Otandy súiý. Elin, jerin súigen azamattyń imany da berik. Búgin Sizder ant qabyldadyńyzdar. Ol da Otanǵa degen súiispenshiliktiń belgisi. Sondyqtan da antqa, bergen ýádege berik, erjúrek bolyńdar, - dep júrekjardy yqylasyn aitty.
«Kenje ulymnyń búgingi ant qabyldaý rásimine januiamyz - zaiybym, qyzym jáne úlken ulym da keldik. Óitkeni, ant berý rásimi áskeri ómirdegi mańyzdy qadam. Endi ár jas sarbaz Otan aldyndaǵy jaýapkershiligin túsineri sózsiz. Áskeri bólim basshylyǵynyń ár qaisymyzben júzdesip, kóńil bólýi, jalpy jaǵdailaryn kórip, kóńilimiz kónshidi», - dep aǵynan jaryldy oraldyq Ǵazy Musaev.
Sondai-aq, sonaý Ekibastuzdan kelgen Zaida Ábdirahmanova: «Uldarymnyń barlyǵy áskerge bardy. Endigi kezek nemerelerimde. Nemeremniń tuńǵyshy osynda boryshyn óteýde. Onyń búgingi ant berý rásimine ádeilep keldim. Álemdi qarasaq, nebir qantógis oqiǵalardy kórip otyrmyz. Elimiz Elbasynyń arqasynda osy tynyshtyǵynan jańylmasyn. Ulyma erjúrek bol deimin», - dep aq batasy arnady.
Antty ústimizdegi jyldyń kókteminde Otan aldynda áskeri merzimdi boryshyn óteý úshin shaqyrylǵan sarbazdar qabyldady.
Ulttyq ulan jaily atap óter bolsaq, Elbasy N.Nazarbaev táýelsizdik alǵannan keiingi quqyqtyq tártipti qamtamasyz etýge jiti kóńil bóle otyryp, egemendik deklaratsiiasy jariialanǵannan keiin nebári 26 kúnnen keiin, iaǵni 1992 jyldyń 10 qańtarynda memleketimizde alǵashqy kúsh-qýat organy retinde Ishki áskerdi qurǵan bolatyn. Sol kezden bastap keshegi Ishki ásker, búgingi Ulttyq ulannyń jeke quramy alǵa qoiylǵan tapsyrmalardy laiyqty túrde oryndap, jeke adam men azamattyń konstitýtsiialyq quqyǵyn, qaýipsizdigin, qoǵam qundylyqtaryn, memleket turaqtylyǵy men tynyshtyǵyn qaýip-qaterlerden jan-jaqty qorǵaý jolyndaǵy jaýapty qyzmeti abyroimen atqaryp keledi Biyl Ulttyq ulannyń qurylǵanyna 25 jyl toldy.
Maior Arman ÁÝBÁKIROV,
Almaty qalasy
