Elimizdiń birqatar qalasy men aýdandarynda úilerdi aralaý jumystary aiaqtaldy. Bul týraly QazAqparat Ulttyq statistika biýrosynyń baspasóz qyzmetine silteme jasap habarlaidy.
Oblys ortalyqtarynyń ishinde Túrkistan qalasynda birinshi bolyp halyq sanaǵy aiasynda úilerdi aralaý jumystary aiaqtalǵan. Munda 220 553 respondent saýalnamadan ótti nemese qamtý kórsetkishi 118%-i quraǵan.
Óńirde sondai-aq, Kentaý men Arys qalalary da sanaq aiasyndaǵy saýalnama jumystaryn támamdady.
Almaty oblysynyń Tekeli qalasy da saýal salý sharalaryn aiaqtaǵan eldi mekenderdiń qataryna endi. Munda respondentter sany 29 509 (100,1%) adamdy quraǵan. Qaraǵandy oblysynyń Nura aýdany da saýalnama júrgizý kezeńin aiaqtap, respondentter sanyn shyǵarǵan. Olardyń qatary 21 837 nemese 1 tamyzdaǵy jaǵdai boiynsha halyq sanynyń 99,4%-in qurady.
Al Qyzylorda oblysyndaǵy Baiqońyr qalasy men barlyq aýdandar (Aral, Jalaǵash, Jańaqorǵan, Qazaly, Qarmaqshy, Syrdariia, Shieli) sanaq aiasynda saýalnama júrgizý sharalaryn aiaqtaǵan. Baiqońyrda 1 tamyzdaǵy derekke sáikes, halqynyń sany 39548 adamdy qurasa, saýal salý nátijesinde 39 622-ge (100,2%) jetkeni belgili boldy.
Saýalnama kezeńin aiaqtaǵan eldi mekenderde naqtylaý sharalary qosymsha júrgiziletin bolady.
28 qazandaǵy jaǵdai boiynsha halyqty sanaqpen qamtý kórsetkishi 18 663 838 adamǵa nemese 98,1%-ke jetti.
Qamtý kórsetkishi boiynsha Almaty qalasy kósh basynda – 108,9%. Iaǵni, 1 tamyzdaǵy jaǵdai boiynsha megapoliste turaqty turatyndardyń sany 2 005 496 adamdy quraǵan. Onlain sanaq pen interviýerler júrgizgen saýalnamanyń aralyq nátijeleri qazirgi ýaqytta qalada 2 183 534 respondent bar ekenin kórsetti. Saýal salý jumystary áli de jalǵasýda.
Osyǵan uqsas jaǵdai Jambyl (102,2%), Almaty (102,1%), Túrkistan (101,5%), Shyǵys Qazaqstan (101,1%) oblystary men Shymkent (101,4%) qalasynda qalyptasty. Bul óńirlerde de sanaq jumystary aiaqtalǵan joq.
2021 jylǵy Ulttyq sanaqtyń negizgi kezeńi Qazaqstanda 1 qyrkúiekten 30 qazanǵa deiin ótýde. Qarashanyń 8-ne deiin sanaq ótkizý ádistemesine sáikes, naqtylaý sharalary qarastyrylǵan.
