6 jeltoqsanda Qazaqstan Respýblikasynyń Ulttyq mýzeiinde «Ulttyq mýzeige syi tartý» aktsiiasynyń úsh jyldyq qorytyndysy boiynsha kórme ótti.
«Ulttyq mýzeige syi tartý» aktsiiasy Ulttyq mýzeidiń tól jobasy retinde 2015 jylǵy 18 naýryzdan beri dástúrli túrde uiymdastyrylyp keledi.
Munyń negizgi maqsaty: ulttyq tarihi-mádeni muralarymyzdy saqtaý máselesine qoǵam nazaryn aýdarý, el arasynda eleýsiz jatqan tarihi mańyzy zor qundy zattardy, ultymyzdyń uly tulǵalarynyń jádigerlerin kásibi turǵyda saqtaý, kópshilik nazaryna usyný.
QR Ulttyq mýzeii direktorynyń orynbasary Abai Satýbaldin: «Úsh jyldyq tájiribede kórsetkendei aktsiia óz maqsatyna jetip, mýzei qoryn qundy jádigerlermen tolyqtyrý tarapynan baǵytymyz aiqyndala tústi. El arasynda eleýsiz jatqan úsh myńǵa jýyq tarihi muralarymyzdy, uly tulǵalarymyzdyń qundy jádigerlerin jinaqtadyq. Biz ár jádigerdi kásibi deńgeide saqtaýǵa kepildik beremiz, ol úshin Ulttyq mýzeide tolyq jaǵdai bar. Sonymen qatar bul muralar túrli taqyryptyq kórmelerge arqaý bolyp, ǵylymi ainalymǵa túsedi. Osy aktsiia arqyly elimizdiń rýhani birligin nasihattaǵymyz kelgen. Osy oraida belsendilik tanytqan ár azamatqa aitar alǵysymyz sheksiz», - dedi.
Osy ýaqytqa deiin atalmysh shara Astana, Almaty, Qyzylorda, Shymkent, Aqtóbe, Qostanai, Oral, Petropavl, Taraz, Taldyqorǵan qalalarynda ótkizildi. Úsh jylǵa ulasqan aktsiiaǵa 300-den asa jeke tulǵalar qatysyp, elimizdiń Bas mýzeiiniń qoryna barlyǵy 3000-nan astam asa qundy jádiger qabyldandy. Qorytyndy kórmege 2015 jyldan bastap búgingi tańǵa deiingi «Ulttyq mýzeige syi tartý» aktsiiasy boiynsha jinaqtalǵan qundy jádigerler qoiyldy.
Qazaqstannyń eńbek sińirgen óner qairatkeri, aitysker aqyn Nadejda Andreevna Lýshnikova: «Alaiyn aldymenen amandasyp, Otyrǵan úlken-kishi zamandasym! Ulttyq mýzei kórmege shaqyrǵanda, Úiinde Nadejda aqyn qalai qalsyn. «Bala bolsa, besik tabylady» demekshi, mine Ulttyq mýzeidi quryp edińizder, el-jurttan tam-tumdap qanshama dúnie jinaqtalyp jatyr. Men aitysqa túskende alǵan shapanym tur eken osy kórmede. Almatynyń toiynda Qajytai degen aqynmen aitysyp, sonda Oljas Súleimenovtyń anasy osy shapandy syilaǵan edi. Mýzeidiń qoryna tapsyryp edim, mine tórinde tur. Jan-jaqtan jinalǵan muralar qutty bolsyn! Elimiz aman, irgemiz berik bolsyn!», dep tilek bildirdi.
Osy shara aiasynda Ámire Qashaýbaevtyń kúmis medali Ulttyq mýzei qoryna saltanatty túrde tabystaldy. Ámire Qashaýbaev – kontserttik saparmen shetel asyp óner kórsetken alǵashqy qazaq: 1925 jyly Parij qalasynda kúmis medalge ie bolǵan. Ámireniń bul nagradasyn otandasymyz Djýliia Gani 2016 jyly Qazaqstanǵa tuńǵysh ret qalyń jurtshylyqtyń nazaryna usynyp, «Ámire» filminiń Bas prodiýseri Alidar Ótemuratovtyń qolyna tabystaǵan.
Ámire qazaqtyń tuńǵysh kásibi teatrynyń uiymdastyrylýyna belsene aralasyp, sol jerde M.Áýezovtyń «Eńlik-Kebeginde» Japal qoishynyń beinesin somdaidy. 1933 jyly mýzykalyq stýdiia qurylyp, alǵashqylardyń biri bolyp Ámire daýsyn jazdyrǵan.
Budan basqa «DAR» kompaniiasy mýzeidiń qoryna Alidar Ótemuratovtyń «Ámire» filmine arnaiy jasalǵan eki dombyrany (rekvizit), sonymen birge 1925 jyly Parij qalasynda ótken halyqaralyq ánshiler konkýrsy týraly uiymdastyrýshylar men tyńdaýshylardyń pikirleri men maqalalary jariialanǵan sol kezdegi gazet qiyndylarynyń kóshirmelerin syiǵa tartty.
Bul sharaǵa Memleket jáne qoǵam qairatkeri D.A. Qonaevtyń jieni Janneta Serikbaeva, Qazaqstannyń eńbek sińirgen óner qairatkeri, maitalman aitysker aqyn Nadejda Andreevna Lýshnikova, «Ámire» filmindegi basty keiipkerdi somdaýshy akter Sanjar Madiev, sýretshi Ábilhan Qasteevtiń shóberesi Aisanym Qasteeva, aqyn Tumanbai Moldaǵalievtiń shákirti Aýyt Muhibek, t.b. qatysty.
Ulttyq mýzei basshylyǵy aktsiiaǵa úles qosqan azamattarǵa arnaiy syilyqtar tabystap, alǵys hatpen marapattady.
