Búgingi tańda jas býyndy kásibi baǵdar bere otyryp tárbieleý – bilim berý júiesi aldyndaǵy úlken mindetterdiń biri. Elbasynyń «Ult jospary 100 naqty qadam» baǵdarlamasy aiasynda «Urpaq+» mádeni-bilim berý jobasy bekitildi. Bul jobanyń maqsaty – óskeleń urpaqty tarih, arheologiia jáne mádeniet salalaryna tartyp, qazaqtyń tarihy men mádenietin tereń tanyp bilýine jol ashý.
Qazaqstan Respýblikasynyń Ulttyq mýzeiinde «Urpaq+» mádeni-bilim berý jobasy boiynsha 2016 jylǵy oqý jylynan bastap «Jas arheolog» úiirmesi óz qyzmetin atqara bastady. Arheologiialyq úiirme kýrsynyń maqsaty – tálimgerlerdi arheologiiaǵa, týǵan ólkesiniń ejelgi tarihyna tartý, olardyń rýhani-adamgershilik dúnietanymyn, týǵan eline degen azamattyq-patriottyq sezimin qalyptastyrý. Arheologiia gýmanitarlyq, jaratylystaný jáne naqty ǵylymdar sheginde turǵan ǵylym, sondyqtan tálimgerlerde arheologiia negizinde basqa da kóptegen ǵylym salalaryna úlken qyzyǵýshylyqtary paida bolatyny sózsiz.
Ejelgi adamdardyń qural-jabdyqtary týraly kitaptan oqyǵan nemese muǵalimniń áńgimesi – ol quraldardy óz kózimen kórip, qolymen ustaǵandaǵydai áser bolmaidy. Tájiribe kórsetkendei, arheologiialyq qazba jumystaryna qatysqan oqýshylardyń tarihqa degen qyzyǵýshylyǵy edáýir artady. Elimizdiń tarihy men mádenietiniń iri ortalyǵy bolyp tabylatyn Ulttyq mýzei negizindegi úiirme ár sabaqty mýzei eksponattarymen tanysa otyryp bekitýge múmkindik beredi. Sonymen qatar tájiribelik sabaqtar QR Ulttyq mýzeiiniń «Halyq qazynasy» ǴZI-nyń jádigerlerdi alǵashqy qalpyna keltirý men jańǵyrtý zerthanasynda júrgiziledi.
«Jas arheolog» úiirmesine Astana qalasy № 83 mektep-gimnaziiasynyń oqýshylary qatysady. Jas arheologtar ár sabaqty taǵatsyzdana kútip, úlken qyzyǵýshylyqpen keledi. Teoriialyq jáne tájiribelik sabaqtardy «Halyq qazynasy» ǴZI-nyń ǵylymi qyzmetkerleri Mamirov T.M., Kairmagambetov A.M., Nusqabai A., Kasenalin A.E. júrgizedi. Arheolog-mamandar men tálimgerler arasyndaǵy tikelei qarym-qatynas jas urpaqty otan tarihynyń tereńine úńilýge jáne alǵan bilimi arqyly biliktilikterin jetildirýge jaqsy yqpal eteri anyq.
Akkoshkarova J.T.
QR Ulttyq mýzeiiniń
«Halyq qazynasy» ǴZI-nyń qyzmetkeri
