© Photo: Pexels
Ulttyq ekonomika ministri Álibek Qýantyrov Ulttyq qordyń investitsiialyq tabysynan aqsha qai jylda týǵan balalarǵa aýdarylatynyn aitty, dep habarlaidy Sputnik Qazaqstan agenttigi.
Prezident Qasym-Jomart Toqaev sońǵy Joldaýynda Ulttyq qordyń investitsiialyq tabysynyń 50 protsentin balalardyń shotyna aýdarýdy usyndy. Bul bastama 2024 jyldan bastap qolǵa alynady.
Úkimet pen Ulttyq banktiń esebi boiynsha elimizde jyl saiyn 400 myń sábi dúniege keledi. Ár bala 18 jasqa tolǵansha olardyń esepshotynda kemi 3 myń AQSh dollaryna teń qarajat jinalady. Ony 18 jasqa deiin alýǵa tyiym salynady. Al kámelet jasqa tolǵan soń, baspana nemese bilim alý úshin jumsaýǵa ruqsat beriledi.
"Bul júie 2024-ten bastap engiziledi. 18 jasqa tolmaǵan barlyq bala qamtylady. Jańa týǵan balalar ǵana emes, barlyq balaǵa aýdarylady", - dedi Qýantyrov jýrnalisterge bergen suhbatynda.
Ministrdiń aitýynsha, aldaǵy eki aida esep-qisap jasalady. Sonyń negizinde naqty usynystar ázirlenedi. Investitsiialyq tabystyń bir bóligin balalardyń shotyna aýdarý tártibi de daiyndalady.
"Ulttyq qordyń ózi azaiyp qalmaidy. Al investitsiialyq tabys bir jylda kóp, bir jylda az bolýy múmkin. Sonyń barlyǵy sheteldik naryqtarǵa bailanysty bolady. Sebebi ulttyq qordyń aqshasy sol naryqtarǵa salynady. Osylaisha, tabystyń bir bóligi balalardyń esepshotyna túsedi. Biraq ony birden paidalanýǵa bolmaidy. Ol aqsha da jai jatpaidy, investitsiia retinde kóbeitedi. Al 18 jastan keiin baspana alýǵa nemese bilimge jumsaýǵa bolady", - dep atap kórsetti Qýantyrov.
Bas ekonomist balalardyń shotyna túsetin aqshaǵa úi alýǵa bolady dep sanaidy.
"Úi baǵasy ár jerde ártúrli ǵoi, aýyl bar, qala bar. Biraq keibir aýyldardan úi alýǵa jetedi. Mysaly, aýyldaǵy úi 1,5-2 million tursa, alýǵa bolady. Ipoteka alý úshin alǵashqy jarna retinde paidalanýǵa múmkindik beriledi. Soǵan jetetin shyǵar", - dep atap kórsetti Qýantyrov.
