Ulttyq qordyń aktivteri 54,9 mlrd dollardy qurady. Bul týraly búgin Úkimet otyrysynda QR Ulttyq bank tóraǵasy Erbolat Dosaev aitty, dep habarlaidy QazAqparat.
«Ulttyq qordyń aktivteri osy jylǵy qarashanyń sońynda 54,9 mlrd AQSh dollaryn qurady. Qarashada 310 mlrd teńgege nysanaly jáne kepildik berilgen transfertter bólýdi qamtamasyz etý úshin 617 mln AQSh dollary satyldy. Qarashada Ulttyq qorǵa 657 mlrd teńge, onyń ishinde shetel valiýtasynda 1 mlrd AQSh dollary túsim tústi», - dedi ol.
UB tóraǵasynyń aitýynsha, Ulttyq qordyń investitsiialyq kirisi osy jylǵy qarashada teris qalyptasyp, negizinen damyǵan elderdiń aktsiialar jáne obligatsiialar portfelderiniń tiisinshe (-)2,11 jáne (-) 0,64 paiyzǵa tómendeýi esebinen (-) 541 mln AQSh dollary boldy.
«Koronavirýstyń jańa shtamyna bailanysty naryqtardyń joǵary qubylmalylyǵyna qaramastan, investitsiialyq kiris jyl basynan bastap oń qalyptasyp, 1,4 mlrd AQSh dollary nemese 2,52 paiyz boldy», - dedi Erbolat Dosaev.
