Foto:depositphotos.com
Biryńǵai jinaqtaýshy zeinetaqy qory «Ulttyq qor — balalarǵa» jobasy boiynsha bala shotyna túsip jatqan soma týraly túsinik berdi.
"Ulttyq qor-balalarǵa" baǵdarlamasy boiynsha BJZQ-ǵa alǵashqy nysanaly talaptar (18 jasqa deiingi balalarǵa) eseptelinip, nysanaly jinaqtaý shottaryna alǵashqy nysanaly jinaqtar (2024 jyly 18 jasqa tolatyn balalarǵa) tústi.
2024 jyldyń 1 qańtarynan bastap baǵdarlamaǵa 2023 jyldyń sońyndaǵy jaǵdai boiynsha kámeletke tolmaǵan, Qazaqstan azamaty bolyp esepteletin barlyq balalar qatysýshy retinde tirkeldi.
Baǵdarlamaǵa qatysýshylardyń jalpy sany - 6 919 131 bala (qosa alǵanda, 01.01.2006j. bastap 31.12.2023j. deiin týǵan balalar). Onyń ishinde 304 815 qatysýshy 2024 jyly 18 jasqa tolady (qosa alǵanda, 01.01.2006j. bastap 31.12.2006j. deiin týǵan balalar)" - delingen habarlamada.
BJZQ málimetinshe, olardyń barlyǵyna ótken jyl úshin Qazaqstannyń Ulttyq qorynan 100 AQSh dollary jáne 52 tsent mólsherinde birdei soma eseptelgen.
"Bul tek alǵashqy esepteýler ekenin túsiný mańyzdy. Jyl saiyn bul soma Ulttyq qor aktivteriniń ósýi jáne investitsiialyq kiris alý esebinen ulǵaiyp otyrady. Budan bólek, eseptelgen qarajat Ulttyq qordyń valiýtalyq aktivteriniń quramynda investitsiialanýyn jalǵastyrady jáne Baǵdarlamaǵa qatysýshy balalarǵa olar 18 jasqa tolǵanǵa deiin qosymsha investitsiialyq kiris ákeledi.
18 jasqa 2024 jyly tolatyn balalarǵa atalǵan soma olardyń BJZQ-da avtomatty túrde ashylǵan nysanaly jinaqtaý shottaryna tústi. Baǵdarlamanyń bul qatysýshylary ózderiniń nysanaly jinaqtaryn turǵyn úige nemese bilim alýǵa kámeletke tolǵannan keiin birden paidalanýǵa quqyly bolady" - delingen habarlamada.
Sondai-aq BJZQ "nysanaly talaptar – bul Qazaqstan Respýblikasy Úkimetiniń elimizdiń 18 jasqa deiingi azamattary bolyp tabylatyn balalary aldyndaǵy Ulttyq qorda jyl saiynǵy investitsiialyq kiristiń 50% esebinen qalyptastyrylatyn mindettemeleri" ekenin eske saldy. Ol sońǵy 18 jylda (esepti jyldyń aldyndaǵy) ortashalanǵan kiristilik mólsherlemesi boiynsha esepteledi. Nysanaly talaptar retinde eskeriletin qarajat bala 18 jasqa tolǵanǵa deiin investitsiialanýyn jalǵastyrady jáne olarǵa jyl saiyn qosymsha investitsiialyq kiris esepteledi.
Zańǵa sáikes, nysanaly talaptardy paidalaný quqyǵy bala 18 jasqa tolǵannan keiin ǵana paida bolady. Bala 18 jasqa tolǵan jyly jinaqtalǵan nysanaly talaptar somasy BJZQ-da ashylǵan balanyń nysanaly jinaqtaý shotyna turǵyn úige nemese bilim alýǵa paidalaný úshin aýdarylady.
"BJZQ-da Qazaqstan azamattary bolyp tabylatyn jáne aǵymdaǵy jyly 18 jasqa tolatyn balalardyń nysanaly jinaqtaý shottarynda jinaqtalǵan aqsha nysanaly jinaqtar dep atalady. Osy qarajatty paidalaný úshin baǵdarlamanyń kámeletke tolǵan qatysýshysy nysanaly jinaqtardy BJZQ-dan AQSh dollarymen aýdarylatyn banktik shot ashyp, ýákiletti operatorlarǵa júgine alady. BJZQ-men kelisim jasasqan jáne "Ulttyq qor - balalar" baǵdarlamasy boiynsha jumys isteitin ýákiletti operatorlardyń tizimi enpf.kz saitynda ornalastyrylǵan.
BJZQ "Ulttyq qor – balalarǵa" baǵdarlamasy boiynsha barlyq nysanaly talaptar men nysanaly jinaqtardy (jinaqtalatyn investitsiialyq kiristi qosa alǵanda) AQSh dollarymen esepke alýdy júzege asyrady, sondai-aq, baǵdarlamaǵa qatysýshylar boiynsha aqparat beredi" - delingen resmi habarlamada.
Balanyń baǵdarlamaǵa qatysýy týraly jáne eseptelgen nysanaly talaptar týraly aqparatty kámeletke tolmaǵan balanyń ata-anasy (nemese basqa da zańdy ókilderi) arnaiy ashylǵan kids.enpf.kz saitynda (balanyń JSN boiynsha) teksere alady. Munda siz, sondai-aq, baǵdarlamanyń sharttarymen, nusqaýlyqpen tanysyp, ózińizdi qyzyqtyrǵan saýaldarǵa jaýap ala alasyz. Ata-analar óz balalary boiynsha eseptelgen qarjy týraly derekterdi egov.kz portalyndaǵy Jeke kabinetinde teksere alady.
Nysanaly jinaqtardy kámeletke tolǵan azamat enpf.kz saityndaǵy óziniń Jeke kabinetinde, BJZQ-nyń uialy qosymshasynda nemese egov.kz portalynda óz betinshe teksere alady.
Elimizdiń jasy, jynysy, óńirleri bólinisindegi esepteýler boiynsha statistikalyq esepter enpf.kz saitynda turaqty túrde ornalastyrylady.
Nysanaly talaptarǵa/nysanaly jinaqtaýǵa qatysýshylardyń
jynysy men týǵan jyly boiynsha sany:
týǵan jyly | jynysy | ||
erkek | áiel | barlyǵy | |
2006 | 156 003 | 148 812 | 304 815 |
2007 | 169 535 | 161 122 | 330 657 |
2008 | 187 098 | 177 706 | 364 804 |
2009 | 185 549 | 174 688 | 360 237 |
2010 | 189 443 | 179 762 | 369 205 |
2011 | 191 954 | 181 958 | 373 912 |
2012 | 194 720 | 186 028 | 380 748 |
2013 | 199 283 | 187 910 | 387 193 |
2014 | 204 706 | 194 048 | 398 754 |
2015 | 204 745 | 193 648 | 398 393 |
2016 | 206 255 | 193 580 | 399 835 |
2017 | 200 683 | 188 487 | 389 170 |
2018 | 204 014 | 192 501 | 396 515 |
2019 | 206 223 | 193 756 | 399 979 |
2020 | 219 068 | 205 488 | 424 556 |
2021 | 228 076 | 215 192 | 443 268 |
2022 | 210 091 | 198 141 | 408 232 |
2023 | 200 654 | 188 204 | 388 858 |
barlyǵy | 3 558 100 | 3 361 031 | 6 919 131 |
