Ulttyq testileý ortalyǵynyń direktory Didar Smaǵulov Ulttyq biliktilik testileýinde tyiym salynǵan zat paidalanǵan muǵalimder týraly beinerolik túsirip, áleýmettik jelide taratýdy usyndy, dep habarlaidy QazAqparat.
«Ulttyq biliktilik testileýinde tyiym salynǵan zattardy paidalanǵan muǵalimderge qatysty beinerolik shyǵaryp, áleýmettik jeliler arqyly taratýdy usynamyz. Óitkeni, sózben de aittyq, jinalystarda da eskerttik. Testileý ótetin jerge bilim basqarmalarynyń ókilderi de keledi. Biraq, ókinishke orai jaǵdaidyń jaqsaratyn túri joq. Muǵalimder tyiym salynǵan zattardy qoldanýǵa tyrysady. Sondyqtan bizdiń usynysymyz, naqty faktiler boiynsha qai oblystyń muǵalimi ekendigin kórsetip, beinerolikter taratsaq», - dedi Didar Smaǵulov Bilim jáne ǵylym ministrliginiń onlain formatta ótken apparat jinalysynda.
Osy oraida QR Bilim jáne ǵylym ministri Ashat Aimaǵambetov bul usynysty zańnamalyq turǵyda qarastyrý qajettigin basa aitty.
«Óitkeni, bul jeke adamnyń quqyǵyna qatysty. Árine, biz bir jaǵynan ustazdardyń mártebesi desek, ekinshi jaǵynan osyndai keleńsiz jaǵdailar bolǵanda ony da aitýymyz kerek. Bes saýsaq birdei emes. Keibir áriptesterimiz zańǵa qaishy qylyqtary bolsa tiisti shara qoldanýymyz qajet. Óte qatań shara qoldanylatyn bolady. Eki jumanyń ishinde 296 muǵalim zańsyz áreketke barǵan. Birinshiden, quqyq qorǵaý organdary tiisti jumys júrgizip bastady. Ekinshiden, bizdiń komitet óz jumysyn bastaýy tiis. Úshinshiden, bilim basqarmalary, bólimder, mektep basshylary ár fakti boiynsha qyzmettik tekserý júrgizip, naqty shara qoldanýy kerek. Akademiialyq adaldyq degen osydan bastalady», - dedi Ashat Aimaǵambetov.
