Foto: Akorda.kz
Timýr Súleimenov Qazaqstan Ulttyq Bankiniń jańa basshysy boldy. Senat depýtattary 4 qyrkúiekte ótken Palata otyrysynda jańa tóraǵany taǵaiyndaýǵa kelisim berdi, - dep habarlaidy Tengrinews.kz.
Súleimenovtiń kandidatýrasyn senatorlarǵa Memleket Basshysynyń usynysy negizinde Prezident Ákimshiliginiń basshysy Oljas Bektenov usyndy.
"Timýr Muratuly tórt jyldan astam Prezident Ákimshiliginde jumys istedi, áleýmettik-ekonomikalyq damý blogyn basqardy, osy saladaǵy reformalardy iske asyrýǵa belsendi qatysty. Buǵan deiin Ulttyq ekonomika ministrligin basqarǵan. Onyń jeke qasietteri men biliktiligi Ulttyq banktiń qyzmetin jetildire alady. Súleimenov Timýr Muratulynyń Ulttyq bank basshysy laýazymyna kandidatýrasyn qoldaýdy suraimyz", - dedi Bektenov.
Depýtattar ashyq daýys berýde Súleimenovtiń kandidatýrasyn qoldady.
"Timýr Súleimenov - bilikti maman. Onyń kandidatýrasy Senattyń Qarjy jáne biýdjet jónindegi komitetiniń keńeitilgen otyrysynda talqylandy", - dep atap ótti komitet tóraǵasy Sultanbek Maqejanov.
