Qazaqstannyń Ulttyq banki teńge baǵamynyń quldyraityny týraly sybysqa bailanysty málimdeme jasady, dep habarlaidy sputniknews.kz agenttigi.
Qarjy naryǵyn retteýshiniń baspasóz qyzmeti áleýmettik jelilerde, sondai-aq messendjerler arqyly teńge baǵamy jáne infliatsiia deńgeiiniń ósimi týraly jalǵan aqparat tarap jatqanyn habarlady.
"Qazaqstannyń Ulttyq banki atalǵan aqparat shyndyqqa janaspaitynyn habarlaidy. Qazirgi tańda aiqyn jáne eleýli táýekelder joq", — dep málimdedi Ulttyq bank.
Retteýshiniń málimetinshe, sońǵy ýaqytta baiqalyp otyrǵan teńgeniń aiyrbas baǵamynyń bolmashy ǵana qubylýyna, eń aldymen, demalystar maýsymyna bailanysty sheteldik valiýtaǵa suranystyń artýy sebep bolyp otyr. Sonymen qatar AQSh Federaldy rezervti júiesiniń mólsherlemeni arttyrýy da áser etken, sonyń saldarynan álemdik naryqta AQSh dollary nyǵaiyp, damýshy naryqtardan kapitaldardyń azdap jylystaǵany baiqalǵan.
"Teńgeniń aiyrbas baǵamyna álemdik munai naryǵy oń yqpal etip jatqany baiqalýda. Munai baǵasy ortasha alǵanda barreline 70 AQSh dollary shamasynda qalyptasyp otyr. Osy sebepti eldiń tólem balansy jaqsara túsýde", — dep jazylǵan málimdemede.
Retteýshiniń málimetinshe, jyldyq infliatsiia maqsatty dálizde odan ári tómendep jatyr. Mamyrda onyń deńgeii 6,2% paiyzdy qurady.
Sonymen qatar, jyl basynan beri azyq-túlik jáne azyq-túlik emes taýarlar, sondai-aq halyqqa kórsetiletin qyzmetter boiynsha infliatsiianyń qarqyny tómendegen.
Ulttyq bank jalǵan aqparattyń avtorlary men taratýshylardy anyqtaý úshin quqyq qorǵaý organdarynan kómek surady.
