Shyǵys Qazaqstan oblysynda sábiz ben kartop baǵasy erekshe qymbattaǵan, dep habarlaidy QazAqparat.
Bul týraly Ulttyq bank maýsym aiyndaǵy infliatsiia kórsetkishteri týraly málimetinde jariialady.
Ulttyq bank sarapshylary azyq-túlik taýarlarynyń qymbattaýy tutyný baǵasynyń indeksine qatty áser etip otyrǵanyn aitady. Banktiń aqparatyna súiensek, maýsym aiynda jumyrtqanyń baǵasy 13,9%-ǵa tómendegen.
«Shyǵys Qazaqstan oblysynda azyq-túlik taýarlarynyń baǵasy 2,3%-ǵa, Almaty qalasy men Aqtóbe oblysynda 2,0%-ǵa, Túrkistan oblysynda 1,0%-ǵa ósti. Shyǵys Qazaqstan oblysynda jemister men kókenister baǵasy basqa óńirlerge qaraǵanda joǵaryraq ósti (14,6%), ásirese sábiz (144,3%) ben kartop (111,5%), al Qazaqstan boiynsha sábiz 86,3%- ǵa, al kartop 40,7%-ǵa qymbattady», - dep jazady Ulttyq bank mamandary.
Sondai-aq, sábiz Aqmola, Pavlodar, Atyraý, Qyzylorda jáne Aqtóbe oblystarynda da 2 eseden artyq qymbattady. Kartop baǵasy Pavlodar, Aqtóbe jáne Mańǵystaý oblystarynda jalpy eldegi ósimnen joǵaryraq qarqynmen ósken kórinedi.
Ulttyq statistika biýrosnyń deregi boiynsha, qyzylsha elimiz boiynsha orta eseppen 47,0%-ǵa qymbattady. Eń joǵarǵy ósim Batys Qazaqstan oblysynda tirkeldi (113,4%).
Bir aida azyq-túlik emes taýarlardyń qymbattaýy 0,8% (mamyrda – 0,6%) bolǵan.
«Eń joǵarǵy ósý Nur-Sultan qalasynda oryn aldy (1,3%). Qalada jýǵysh jáne tazalaǵysh quraldar men jeke qoldanatyn taýarlar baǵasynyń da qymbattaýy (2,6% jáne 2,5%) tirkeldi. Jalpy elde bul taýarlardyń baǵasy 0,6% joǵarylady. Ótken aida elde janarmai baǵasy aitarlyqtai ózgergen joq (0,3%). Al keibir óńirlerde onyń baǵasy azyn-aýlaq tómendedi», - dep jazylǵan Ulttyq banktiń saraptamasynda.
Al qyzmetter aqysynyń bir aidaǵy qymbattaýy 0,7% boldy. Mamyr aiynda da osyndai mede tirkelgen bolatyn. Aqyly qyzmetterdiń aitarlyqtai qymbattaýy Soltústik Qazaqstan (2,1%) jáne Atyraý (1,7%) oblystarynda tirkelgen kórinedi. Atap aitsaq, bul óńirderde elektr energiiasy 18,5% jáne 16,9%-ǵa qymbatǵan. Respýblika boiynsha ósim 1,0% ekenin eskersek, bul tym joǵary infliatsiia deýge bolady.
«Shyǵys Qazaqstanda taratý jelileri boiynsha tasymaldanatyn gaz baǵasy 17,0%-ǵa, Soltústik Qazaqstanda 9,9%-ǵa artsa, qalǵan aimaqtarda ózgerissiz qaldy. Basqa aimaqtarda tarifterdiń ózgermegenine qaramastan, Nur-Sultan qalasynda sýyq sý 6,5% qymbattap, ystyq sý 20% arzandady (jalpy el boiynsha ystyq sý 2,7%-ǵa arzandady). Aqtóbe oblysynda da ystyq sý 20% arzandaǵanymen, oblysta jyldyq aqyly qyzmetter infliatsiiasy eń joǵary bolyp qalyp otyr», - delingen resmi málimette.
