Premer-Ministr Asqar Maminniń tóraǵalyǵymen ótken QR Úkimetiniń otyrysynda Memleket basshysy Qasym-Jomart Toqaevtyń 2020 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýyn iske asyrý jónindegi sharalar qaraldy. QR Ulttyq bankiniń tóraǵasy Erbolat Dosaev jáne Qarjy ministri Erulan Jamaýbaev baiandama jasady, dep habarlaidy primeminister.kz saity.
Memleket basshysynyń Qazaqstan halqyna Joldaýyn iske asyrý maqsatynda Ulttyq bank mynadai sharalar qabyldaidy.
Prezidenttiń buǵan deiin bergen tapsyrmasyna sáikes Aqsha-kredit saiasatynyń 2030 jylǵa deiingi strategiiasy ázirlenýde. Joldaýda atalǵan júrgiziletin saiasattyń tiimdiligi men aiqyndylyǵyn arttyrý jónindegi tapsyrmalar Strategiiada eskeriledi. Strategiiany bekitý eldiń 2025 jylǵa deiingi jańartylǵan Strategiialyq damý jospary qabyldanǵannan keiingi ýaqytqa josparlanyp otyr.
Aqsha-nesie saiasatyn iske asyrýdyń tiimdiligin arttyrý jáne valiýta naryǵyn turaqtandyrý úshin Úkimetpen birlesip valiýtalyq túsimdi elge qaitarýǵa arnalǵan qosymsha sharalar pysyqtalady jáne eksporttaýshylardyń ony iske asyrýy úshin qolaily jaǵdailar jasalady.
«Aqsha-nesie saiasatynyń 2030 jylǵa deiingi strategiiasynda Ulttyq bank janynan Aqsha-kredit saiasaty jónindegi komitet qurý eskeriledi, onyń basty mindeti bazalyq stavka men onyń dáliziniń mólsheri boiynsha strategiialyq sheshimder qabyldaý bolady. Orta merzimdi perspektivada oǵan táýelsiz músheler kiredi. Zańnamalyq aktilerge tiisti ózgerister 2020 jyldyń sońyna deiin engiziledi», — dedi EDosaev.
Memleket basshysynyń tapsyrmasy boiynsha ekonomikalyq ósýdi qalpyna keltirý maqsatynda daǵdarys saldarynan aitarlyqtai zardap shekken sektorlardaǵy kásiporyndardy qoldaý úshin qosymsha 200 mlrd teńge bólinedi. Salalar tizbesin Úkimet «Atameken» Ulttyq Kásipkerler Palatasymen birlesip anyqtaidy.
Ulttyq Banktiń jeńildikpen kreditteý baǵdarlamasy 800 mlrd teńgege deiin jetkizilip, 2021 jyldyń sońyna deiin uzartylady.
Qarjy ministrligi Prezident tapsyrmalarynyń tez arada oryndalýyn qamtamasyz etý úshin kelesidei sharalar qabyldaýda.
Kvazimemlekettik sektorda biryńǵai satyp alýdy engizý jónindegi zańǵa qatysty Úkimetke «Kvazimemlekettik sektordyń jekelegen sýbektilerinde satyp alý týraly» zań jobasy engizildi. Zań jobasy barlyq protsedýrany 100% elektrondyq formatqa kóshirý arqyly satyp alýlardyń ashyqtyǵyn arttyrýǵa baǵyttalǵan.
Barlyq retteletin satyp alýdy Biryńǵai tereze arqyly ótkizý josparlanýda. 2019 jyly qoldanystaǵy satyp alý alańdarynyń negizinde «Satyp alýdyń biryńǵai terezesi» portaly quryldy. Biryńǵai tereze operatory retindi «Atameken» UKP belgilendi.
Sonymen birge biryńǵai terezeniń tolyqqandy jumys isteýi úshin jer qoinaýyn paidalanýshylar men tabiǵi monopoliia sýbektileriniń satyp alý alańdarymen yqpaldasý qajet.
«Biyl jyl sońyna deiin shaǵyn jáne orta biznes sýbektilerin jaldaý tólemderinen bosatý boiynsha Jaldaý erejelerine ózgerister engizý jóninde birlesken jumys júrgizilýde. Respýblikalyq jáne kommýnaldyq menshik obektileri boiynsha shaǵyn jáne orta biznes sýbektilerimen tiisti qosymsha kelisimder jasasý josparlanyp otyr. Kvazimemlekettik sektor da olardy basqarý organdarynyń shaǵyn jáne orta biznesti jaldaý tólemderinen bosatý jóninde sheshim qabyldaýy qajet», — dedi qarjy ministri.
Kóleńkeli ekonomikaǵa qarsy kúres aiasynda Qarjy ministrligi basqa da memlekettik organdarmen birlesip keshendi is-sharalar ótkizýde. Kóleńkeli ekonomikaǵa qarsy is-qimyl jónindegi jospar ózektendiriledi jáne offshorlyq iýrisdiktsiialarǵa aqsha aýdarymdary bóliginde zańnama jetildiriledi.
Ministrlik FATF usynymdaryn oryndaidy, atap aitqanda:
- memlekettik jáne kvazimemlekettik sektordyń laýazymdy tulǵalaryna jáne olardyń otbasy múshelerine sheteldik shottardy ashýǵa tyiym salýdy engizý;
- salyq organdarynyń kásipkerlik sýbektilerinen túpkilikti benefitsiarlar týraly málimetterdi alý quqyǵyn zańnamamen bekitý.
Ekonomikalyq yntymaqtastyq jáne damý uiymy elderiniń salyq organdary arasynda aqparat almasý sheńberinde QR rezidentteriniń qarjylyq shottary týraly málimetterge taldaý jasaý jospralanyp otyr. Sonymen qatary salyqtyq jáne kedendik ákimshilendirýdi tsifrlandyrý boiynsha jumys jandandyryldy.
Astana-1, elektrondyq shot-faktýralar júiesi jáne virtýaldy qoima iske qosyldy. Temeki jáne alkogol ónimderin tańbalaý pilottyq joba retinde júrgiziledi jáne onlain-baqylaý kassalyq mashinalary engizildi. Júielerdi integratsiialaý esebinen QHR-men import boiynsha kedendik statistikanyń alshaqtyǵy tómendedi.
Avto jáne temirjol ótkizý pýnktterin jańǵyrtý jónindegi jobany iske asyrý kózdelgen. Keshendi jedel-profilaktikalyq is-sharalar sheńberinde ekonomikalyq tergeý qyzmeti qaita baǵdarlanady:
- munai jáne munai ónimderiniń, aktsizdeletin ónimderdiń zańsyz ainalymy;
- kapitaldyń zańsyz aǵymy;
- biýdjet qarajatyn, onyń ishinde kvazimemlekettik sektorda, urlaý jáne ysyrap etý;
- salyq tóleýden jaltarý;
- jalǵan shot-faktýralardyń úzindileri.
Memleket basshysynyń Qazaqstan halqyna Joldaýynda aitylǵan tapsyrmalaryn qarjylyq qamtamasyz etý:
- osy jáne kelesi jyldardy naqtylaý kezinde;
- 2021-2023 jyldarǵa arnalǵan biýdjet jobasyn talqylaý barysynda júrgiziledi.
«2020 jylǵa arnalǵan respýblikalyq biýdjetti naqtylaý kezinde meditsina qyzmetkerlerin yntalandyrý ústemeaqylaryna, tez salynatyn juqpaly aýrýlar aýrýhanalaryn salýǵa, Tegin meditsinalyq kómektiń kepildendirilgen kólemi (MKKK) sheńberinde meditsinalyq qyzmetterge jáne dárilik zattardy satyp alýǵa arnalǵan shyǵystardy qarjylandyrý josparlanýda. Prezident Joldaýyndaǵy tapsyrmalardy iske asyrýǵa arnalǵan shyǵystar kólemi biýdjettik baǵdarlamalar ákimshilerimen birlesip pysyqtalady», — dep qorytyndylady Jamaýbaev.
