Qazaqstan Ulttyq banki bazalyq mólsherlemeni 9 paiyz deńgeiinde saqtaý týraly sheshim qabyldady, dep habarlaidy "Ult aqparat".
«Qazaqstan Respýblikasynyń Ulttyq banki bazalyq mólsherlemeni paiyzdyq dálizdi +/-1,5 p.t. saqtai otyryp, jyldyq 9% deńgeiinde saqtaý jóninde sheshim qabyldady. Tiisinshe, ótimdilikti berý jónindegi turaqty qoljetimdi operatsiialar boiynsha mólsherleme 10,50% jáne ótimdilikti alý jónindegi turaqty qoljetimdi operatsiialar boiynsha mólsherleme – 7,50% bolady»,– dep habarlady Ulttyq banktiń baspasóz qyzmeti.
Ulttyq banktiń habarlaýynsha, qysqa merzimdi jáne orta merzimdi perspektivada infliatsiia táýekelderiniń teńgerimi eskerile otyryp sheshim qabyldandy.
«Proinfliatsiialyq táýekelder álsiz turaqtandyrylǵan infliatsiialyq kútýlermen, Reseige qatysty sanktsiialyq ritorikanyń údeýi aiasynda qarjy naryqtaryndaǵy turaqsyzdyqtyń artýymen, munai suranysynyń meilinshe baiaý qalpyna kelýin kútýmen jáne fiskaldyq jáne kvazifiskaldyq sharalarmen ekonomikalyq belsendilikti odan ári yntalandyrý táýekelimen kórinedi. Bul rette ekonomikalyq belsendiliktiń qysqarýyna, tutynýshylyq suranystyń baiaýlaýyna jáne álemdik naryqtardaǵy azyq-túlik taýarlary baǵasynyń kútiletin tómendeýine bailanysty dezinfliatsiialyq faktorlardyń da yqpaly baiqalady»,–dep atap ótti banktegiler.
Bazalyq mólsherlemeniń aǵymdaǵy deńgeii infliatsiialyq protsesterdiń serpinin baqylaýdy saqtaýǵa jáne jyldyq infliatsiianyń orta merzimdi kezeńde birqalypty baiaýlaýyn qamtamasyz etýge múmkindik beredi.
Ulttyq bank infliatsiia serpinine áser etetin ishki jáne syrtqy faktorlarǵa monitoring júrgizýdi jalǵastyrady. Bazalyq mólsherleme boiynsha budan bylaiǵy sheshimder infliatsiianyń naqty serpininiń onyń boljamdy baǵdarlaryna, sondai-aq infliatsiialyq táýekelder teńgerimine sáikestigin eskere otyryp qabyldanatyn bolady.
Qazaqstan Respýblikasy Ulttyq bankiniń bazalyq mólsherleme boiynsha kezekti josparly sheshimi 2020 jyldyń 26 qazanynda Nur-Sultan qalasynyń ýaqyty boiynsha saǵat 15:00-de jariialanady.
