Ulttyq bank basshysy Daniiar Aqyshev teńge baǵamynyń qubylýyna qatysty túsinikteme berdi, dep habarlaidy Sputnik Qazaqstan.
Taǵy bir márte eske saldy
Daniiar Aqyshev Ulttyq bank 2015 jyldan beri teńge baǵamyn rettemeitinin eske saldy. Osydan úsh jyl buryn Qazaqstanda teńgeniń erkin aiyrbas baǵamy rejimi engizilgen edi. Tiisinshe, baǵam suranys pen usynys negizinde qalyptasady.
"Qazirgi bolyp otyrǵan jaǵdaidy barlyq damyp jatqan naryqtaǵy turaqsyzdyq elementi dep sanaimyz. Búkil álemde barlyq damyp jatqan valiýtalar, ókinishke qarai, dollarǵa qarsy álsirep jatyr. Qazaqstan da solardyń qatarynda. Biz ekonomikasy ashyq elmiz, álemdik protsesterge yqpaldasqanbyz, sondyqtan álemniń qarjy naryqtaryndaǵy protsesster Qazaqstanǵa da áserin tigizedi", — dedi Aqyshev senat otyrysynda.
Onyń aitýynsha, qazir iri memleketter – Resei, Túrkiia, Argentina jáne basqa elder valiýtasyn birtindep devalvatsiialaýda. Bul úderis teńge baǵamyna da áserin tigizdi.
"Dese de biz teńgeniń qubylmalylyq dárejesi áldeqaida tómen ekenin kórip turmyz", — dedi ulttyq bank basshysy.
Teńgeniń álsireýi – maýsymdyq jaǵdai
"Baǵamǵa áser etetin makroekonomikalyq jáne irgeli faktorlar, eń aldymen, bul ekporttyq taýarlardyń baǵasy, birinshiden, munaiǵa, óte joǵary bolyp otyr. Bul bizde tólem balansy turaqty ekenin kórsetedi. Qazir teńgeniń álsireýi eki nárseden bolyp otyr. Birinshisi – barlyq damyp jatqan naryqtyń álsireýi, ekinshisi – maýsymdyq faktor", — dedi Aqyshev.
Ol maýsym aiynda sheteldik valiýtaǵa suranys únemi artatynyn atap ótti. Óitkeni adamdardyń kóbi shetelge saiahattaidy, balalaryn ózge elderge oqýǵa jiberedi, tiisinshe sheteldik valiýta satyp alady.
"Bul olardyń quqyǵy, qalaǵanynsha satyp ala bersin degim keledi. Al qalǵan azamattarǵa valiýta aiyrbastaý beketterine júgirmeýge keńes berer edim. Sebebi byltyr jazda da dál osyndai jaǵdai bolǵan. Sonda esterińizde bolsa, teńge baǵamy 340 teńgege deiin álsirep, keiin qaita 320 teńgege deiin nyǵaidy", — dedi Ulttyq bank tóraǵasy.
