Búgin UEFA Ulttar ligasyndaǵy alǵashqy oiynynda Qazaqstan quramasy syrt alańda Litvadan basym tústi, dep habarlaidy "Ult aqparat".
Esterińizge sala ketelik, qazaqstandyq qurama S ligasynyń tórtinshi tobynda oinaidy. Qarsylastary - Albaniia, Belarýs jáne Litva quramalary.
Litva quramasy sapyndaǵy fýtbolshylardyń basym bóligi óz eliniń chempionatynda oinaidy. Sondai-aq, Bolgariia, Izrail, Italiia, Latviia, Polsha, Serbiia, Estoniia, Horvatiia chempionattarynda baq synap júrgen fýtbolshylar bar. Al úsh fýtbolshy Qazaqstan Premer-ligasynda oiyn kórsetedi. Atap aitqanda, Petropavldyń «Qyzyljarynda» Vitaýtas Andriýshkiavichiýs, Taldyqorǵannyń «Jetisýynda» Artýras Jýlpa, Jambyl oblysynyń «Tarazynda» Ovidiiýs Verbitskas bar.
Kezdesý Qazaqstan quramasy úshin sátti bastaldy deýge bolady. Alǵashqy minýttarda olar aldyńǵy shepte jii boi kórsetti. Osyndai sátterdiń birinde qarsylastar qaqpasynan sańylaý tapty. Baktier Zainýtdinov 3-minýtta gol soǵyp ketti.
Ekinshi kezeńde qazaqstandyq qurama negizinen qorǵanysqa kóbirek kóńil bóldi. Alań ieleri gol soǵatyn múmkindikterdi izdedi. Degenmen olar 86-minýtta ózderiniń qaqpasyna taǵy bir gol jiberip aldy. Ony qazaqstandyq jartylai qorǵaýshy Islambek Qýat óziniń enshisine jazdy. Osylaisha Qazaqstan quramasy qarsylasynan 2:0 esebimen basym tústi.
Eki qurama buǵan deiin bir márte ǵana kezdesti. 2014 jyldyń 5 naýryzynda Túrkiianyń Antalia qalasynda ótken joldastyq kezdesýde ekeýi 1:1 esebine qanaǵat bildirip tarqasty. Sol sebepti búgingi oiyn tuńǵysh resmi kezdesý sanalady.
Búgin tórtinshi topta taǵy bir oiyn ótkizedi. Belarýs quramasy óz alańynda Albaniiany qabyldaidy.
