Batysqazaqstandyq ýltramarafonshylar Oraldan Atyraýǵa deiin 500 shaqyrym qashyqtyqty júgirip ótti, dep habarlaidy QazAqparat.
Uralsk Runners júgirý klýbynyń quryltaishysy Nádir Qurymbaevtyń aitýynsha, marafonshylar eki kún boiy uiyqtamastan júgirdi.
«Marafon juma kúni tús qaita bastalyp, keshe tańǵy saǵat 04.00-de Atyraýda márege jetti. Qatysýshylar jol boiynda bir-birin almastyryp, arasynda tamaq ishkeni bolmasa, kúni-túni júgirip otyrdy. Mundai marafon Batys Qazaqstan tarihynda alǵash ret uiymdastyryldy. Endi estafetany atyraýlyq marafonshylarǵa tabys ettik», - dedi N.Qurymbaev.
Ýltramarafonǵa Timýr Júkishev, Samat Amanshin, Baýbek Iliiasov, Ashat Ramazanov, Rýstam Berqaliev, Nurlybek Qurymbaev, Azamat Temirhanov, Rýslan Muhambetqaliev, Arhat Esenǵaliev jáne Abzal Salyqov qatysty.
Salaýatty ómir saltyn ornyqtyrý maqsatynda Uralsk Runners júgirý (eriktiler) toby 2018 jyly mamyr aiynda quryldy. Bastapqyda 10 adam múshe bolsa, qazir 100-ge jýyqtady. Olardyń arasynda ár salada qyzmet isteitin túrli jastaǵy adamdar bar.
Biyl jazda klýb músheleri (13 adam) Eýropanyń eń biik shyńy – Elbrýsti (biiktigi – 5 642 metr) baǵyndyrǵan bolatyn. Olardyń arasynda aǵaiyndy Nádir jáne Nurlybek Qurymbaevtar da boldy.
«Elbrýs taýyna baryp kelgennen keiin óz qarjymyzǵa osy marafondy uiymdastyrýǵa niet ettik. Endi aldaǵy aptada Oraldan onshaqty adam Italiiaǵa attanamyz. 10 qarasha kúni Garda qalasynda ótetin halyqaralyq jartylai marafonǵa qatysamyz. Bul sheteldegi alǵashqy jarysymyz bolmaq», - dedi N.Qurymbaev.
