Úndistanda er adam eki qyzdyń anasy bolǵan áielin «ul týmady» degen sebeppen óltirgeni úshin ómir boiyna bas bostandyǵynan aiyryldy, dep habarlaidy ult.kz.
Anu Bansal kúieýi Manodj Bansalmen 2000 jyly shańyraq kótergen. Erli-zaiyptylardyń eki qyzy bolǵan. Alaida kúieýi men onyń týystary áielden ul bala dúniege ákelýdi talap etken. Sotta marqumnyń qyz bosanǵany úshin uzaq ýaqyt boiy psihologiialyq jáne fizikalyq qysym kórgeni aitylǵan.
Bastapqyda politsiia qylmystyq isti adam óltirý faktisi boiynsha tirkegenimen, keiin oqiǵany sýitsid retinde saralaǵan. Alaida Anunyń qyzdary isti qaita qaraýdy talap etken. Nátijesinde tergeý qaita bastalyp, sotta qyzdary anasynyń ólimine qatysty mańyzdy kýálik bergen.
Sot Manodj Bansaldy áielin «ul týmaǵany» úshin óltirgeni boiynsha kináli dep tanyp, ómir boiyna bas bostandyǵynan aiyrý jazasyn taǵaiyndady.
