Ýkrainadaǵy qoǵamdyq internet-radio jelisinde qazaq eli jaily aqparat taratylatyn bolady, dep habarlaidy "Ult aqparat" «Habar 24» telearnasyna silteme jasap.
«Meniń Qazaqstanym» atty baǵdarlamanyń ashylýyna Kievtegi qazaq diasporasy uiytqy bolǵan. Baǵdarlama ár sársenbi saiyn turaqty túrde efirge shyǵyp turmaq.
Ýkrainanyń «Otchizna» qoǵamdyq internet-radiosynyń álemniń 20-ǵa jýyq elinde 10 myńnan astam tyńdaýshysy bar. Jumysyn jarty jyl buryn ǵana bastaǵan jeli aqparattyq-tanymdyq, mádeni, qoǵamdyq jáne quqyqtyq baǵytta baǵdarlama taratady. Bastapqyda radio álemniń ár jerinde turatyn Ýkraina azamattaryna arnalǵan bolatyn. Bertin kele Ýkrainada ómir súrip jatqan ózge ult ókilderine de efir ýaqyty bóline bastady.
Al 2 qyrkúiek kúni radioda «Meniń Qazaqstanym» jobasy alǵash ret efirge shyqty. Tikelei efirde ulttyń uly aqyny Abaidyń óleńi oqyldy.
«Meniń Qazaqstanym» jobasy turaqty túrde shyǵyp turatyn bolady. Búgingi efir tanymdyq baǵytta ótti. Keleside qazaq halqynyń salt-dástúri, mádenieti men elimizdegi sońǵy jańalyqtarmen bólisip otyrmaqmyz. Ýkraina men Qazaqstan arasyndaǵy mádeni bailanys jaily da aqparat aitylady. Aldaǵy ýaqytta Ýkraina jerindegi tanymal qazaq azamattary, onyń ishinde mýzykant jáne sport salasynda aitarlyqtai jetistikke jetken qazaq jerlesterimiz jaily málimet aityp, efirge qonaqqa shaqyratyn bolamyz», - dedi jobanyń avtory jáne júrgizýshisi Marik Janǵutinov.
«Otchizna» radiosynyń negizin qalaýshy jáne onyń aǵa redaktory Ivan Kokýtsanyń aitýynsha, mundai baǵdarlama Ýkraina-Qazaqstan arasyndaǵy dostyq qarym-qatynasty arttyrýǵa sep bolady.
«Meniń Qazaqstanym» jobasynyń efir ýaqyty - 45 minýt. Ár sersenbi saiyn Kiev ýaqyty boiynsha saǵat 17.00-de, al Astana ýaqytymen keshki 20.00-de efirge shyǵady.
