Úkimettiń ekonomikalyq saiasaty halyqtyń ál-aýqatyn jaqsartýǵa baǵyttalady. Bul týraly búgin Úkimet otyrysynda QR Premer-Ministriniń orynbasary – Saýda jáne integratsiia ministri Baqyt Sultanov aitty, dep habarlaidy QazAqparat agenttigi.
«Úkimettiń ekonomikalyq saiasaty, eń aldymen, halyqtyń ál-aýqatyn jaqsartýǵa jáne ómir súrý sapasyn arttyrýǵa baǵyttalatyn bolady. Ashyq ári teńdestirilgen printsipke sai biýdjet jáne fiskaldyq saiasat qalyptastyrylady. Salyqtyq-kedendik ákimshilendirýdiń batyl sharalary qosymsha tabys kózderin qamtamasyz etedi. Jeke sektordy ekonomikalyq ósý draiveri retinde damytý maqsatynda básekelestikti damytý arqyly shaǵyn jáne orta biznesti kúsheitýge basa nazar aýdarylady», - dedi ministr.
Onyń atap ótýinshe, shaǵyn kásiporyndarǵa kórsetiletin memlekettik qoldaý sharalary tiimdi jáne qoljetimdi bolady.
«Memlekettiń ekonomikadaǵy úlesi ony jekeshelendirý jáne básekeles ortaǵa berý arqyly qysqartylady. Memlekettik aktivterdi basqarý tásilderi qaita qaralady. Jalpy, qarjy-ekonomikalyq blok boiynsha tolyqqandy pysyqtalǵan sharalar Úkimettiń jańa baǵdarlamasyn ázirleý barysynda usynylatyn bolady», - dedi Baqyt Sultanov.
