Ekologiialyq uiymdar qaýymdastyǵynyń tóraǵasy, qoǵam qairatkeri Aigúl Soloveva Qazaqstanda úkimettik emes úiymdardyń damýyna qatysty pikir bildirdi, dep habarlaidy QazAqparat.
Onyń aitýynsha, elimizde azamattyq qoǵamdy damytý tújyrymdamasy ázirlendi. Osy qujat aiasynda damýdyń kezeńderi aiqyndaldy.
«Ómirimizde ózgerister bolyp jatady jáne úkimettik emes uiymdar adamdar men qoǵamnyń qajettigine qarai damýdyń túrli nusqalaryn usynady. Birinshi kezeńde qalyptasý boldy, iaǵni azamattyq qoǵam men úkimettik emes uiymdar, kommertsiialyq emes ári qoǵamdyq uiymdarǵa qatysty túsinik berilip, jumystar bastaldy. Ekinshi kezeńde memleket ózara seriktestikti jolǵa qoidy. Mysaly, Elbasynyń qatysýymen birinshe Azamattyq forým ótip, onda biliktiń, biznestiń jáne úkimettik emes uiymdardyń áriptestigi týraly jariialandy. Bul turǵyda qaiyrymdylyq, demeýshilik, metsenattyq eskerildi», - dedi A. Soloveva Dúniejúzilik úkimettik emes uiymdar kúni aiasynda ótken is-shara barysynda.
Qoǵam qairatkeri qazirgi kezde elimizde úshinshi kezeń júrip jatqanyn, onyń aiasynda qoǵam áleýet pen kúsh-jigerin jinap, damý jolymen kele jatqanyn atap ótti.
«Qoǵamnyń damýyna qarai úkimettik emes uiymdar da ózgeredi. Sebebi olar qoǵam pikiriniń aiqyn kórinisi bolady. Prezident aitqan «Halyq únine qulaq asatyn memleket» tujyrymdamasy da osyǵan bailanysty. Bizde quqyq qorǵaýshy, ekologiialyq uiymdar bar, sondai-aq múmkindigi shekteýli jandardyń qaýymdastyǵy qyzmet etip keledi. Túrli uiymdar biryńǵai odaqqa qosylady, iaǵni azamattyq alians bolyp ózderiniń pikirin jariialap, Memleket basshysyna, ministrlerge deiin jetkizedi. Bul óz kezeginde yntymaqtastyq jyl saiyn nyǵaiyp kele jatqanyn bildirip otyr. Qazirgi kezde memlekettik organdar qoǵam ókilderin tarta otyryp, jumys istep jatyr», - dedi A. Soloveva.
Aita keteiik, búgin Aqparat jáne qoǵamdyq damý ministri Aida Balaeva úkimettik emes uiym ókilderimen kezdesti. Is-shara jyl saiyn 27 aqpanda atap ótiletin Dúniejúzilik úkimettik emes uiymdar kúni aiasynda ótti.
