Osy ýaqytta QR Parlamenti Májilisiniń depýtattaryna «Qazaqstan Respýblikasynyń keibir zańnamalyq aktilerine memlekettik basqarý deńgeileri arasynda ókilettikterdi qaita bólý máseleleri boiynsha ózgerister men tolyqtyrýlar engizý týraly» QR zańynyń jobasy tanystyrylyp jatyr, dep habarlaidy "Ult aqparat".
«Zań jobasy memlekettik basqarý júiesin odan ary jetildirý maqsatynda ázirlendi jáne ministrlikterdiń, jergilikti atqarýshy organdardyń derbestigi men jaýapkershiligin arttyrýǵa baǵyttalǵan. Zań jobasy jekelegen fýnktsiialardy Úkimetten ortalyq memlekettik organdarǵa, sondai-aq ortalyq memlekettik organdardan jergilikti atqarýshy organdarǵa berýdi kózdeidi. Zań jobasymen 55 zańnamalyq aktige, onyń ishinde 5 kodekske, 50 Zańǵa ózgerister men tolyqtyrýlar engizý qarastyrylyp otyr», - dedi zań jobasyn tanystyrýǵa arnalǵan otyrysta Májilis depýtaty Nurtai Sabilianov.
Al zań jobasyn tanystyrǵan QR Ulttyq ekonomika vitse-ministri Aigúl Shaimovanyń aitýynsha, Úkimetten ministrlikterge 88 ókilettik berilip, ministrlikter arasynda 2 fýnktsiia qaita bólinedi. Ortalyqsyzdandyrý jalǵasady. Ortalyqtan óńirlerge 3 fýnktsiia beriledi.
«Oblystyq deńgeiden aýdanǵa jolaýshylar kóligin damytýdyń keshendi syzbasyn jáne jol qozǵalysyn uiymdastyrý jobalaryn ázirleý jónindegi ókilettik beriledi. «Ókilettikterdi qaita bólý ne beredi?» degenge toqtalsaq, eń aldymen Úkimet salalardaǵy saiasatty qalyptastyrýǵa basa nazar aýdaratyn bolady. Memlekettik organdardyń qabyldanǵan sheshimder úshin derbestigi men jaýapkershilik deńgeii artady. Sondai-aq olardy qabyldaýdyń jedeldigi arttyrylady», - dedi vitse-ministr.
