Qazaqstan Úkimeti koronavirýs ahýalyn turaqtandyrýdyń shuǵyl sharalaryn qamtityn egjei-tegjeili jospar jasaǵan. OKQ-da ótken baspasóz máslihatynda Densaýlyq saqtaý ministri Aleksei Tsoi osylai dedi, dep habarlaidy "Ult aqparat".
«Biz sanitarlyq talaptardyń bes altyn erejesin jaqsy bilemiz: maska men qolǵap kiip júrý kerek, qoldy jýyp, qashyqtyqty saqtaý kerek, adam kóp jinalatyn orynǵa barmaǵan jón. Kezdesý kezinde qolmen amandasyp, qushaqtaspaǵan abzal. Alaida is júzinde bul erejelerdiń kóbi saqtala bermeitinin kórip otyrmyz», - dedi ministr.
Aleksei Tsoidyń aitýynsha, osy erejelerdi qatań saqtaǵan jaǵdaida ǵana týǵan-týystaryńyzdy qaýipten qutqarasyz.
«El ishinde indet keńinen tarap barady. Bálkim, halyq arasynda virýstyń jappai taralýyn toqtatý úshin qosymsha sharalar kerek bolar. Álbette, problema men joǵaryda ataǵan máselelermen shektelmeidi. Biraq taǵy bir márte aita keteiin – Úkimet qazirgi jaǵdaidan qalai shyǵý kerektigin kórip otyr ári onda ahýaldy turaqtandyrýdyń shuǵyl sharalaryn qamtityn egjei-tegjeili jospary bar», - dedi Aleksei Tsoi.
Sonymen birge ministr meditsina qyzmetkerleriniń eńbegin erekshe atap ótti.
«Osynaý qiyn-qystaý kezeńde olar týǵan-týystarynyń, otbasynyń ortasynan ketip, qaýipti jaǵdaida naýqastarǵa kómek kórsetip jatyr. Bul jiger men kásipke adaldyqty talap etetin qaterli jumys. Osy sebepti bizdi de túsinip, meditsina qyzmetkerlerin barynsha qoldaýǵa shaqyramyn», - dedi ol.
