QR Premer-Ministri Asqar Maminniń tóraǵalyǵymen ótken Úkimet otyrysynda elektrondyq saýdany damytý máseleleri qaraldy, dep habarlaidy "Ult aqparat" primeminister.kz saityna silteme jasap.
Osy baǵytta júrgizilip jatqan jumystar týraly QR saýda jáne integratsiia ministri B. Sultanov, poshta infraqurylymynyń jai-kúii týraly «Qazposhta» AQ basqarma tóraǵasy S. Sársenov, tsifrlyq keńistikte jaǵdai jasaý týraly QR tsifrlyq damý, innovatsiialar jáne aeroǵarysh ónerkásibi ministri A. Jumaǵaliev baiandady.
Qazaqstannyń elektrondyq saýda naryǵy 2019 jyly 1,8 esege artyp, 700 mlrd teńgeden asty. Bólshek saýdanyń jalpy kólemindegi elektrondyq saýda úlesi 2018 jylǵy 2,9%-dan 2019 jyly 3,7%-ǵa deiin ósti. Qazaqstandyq internet-dúkenderdegi satyp alý kólemi 422 mlrd teńgeni, halyqaralyq internet-alańdarda 280 mlrd teńgeni qurady. Asa tanymal taýarlar — aksessýarlar men tehnika (35%), kosmetika (30%), úige arnalǵan taýarlar (15%), kiim jáne aiaq kiim (10%).
2019 jyly Qazaqstanda 3,2 mln belsendi onlain-satyp alýshy tirkeldi (2018 jyly – 2,3 mln adam). Elimizde 2 myńnan astam internet-dúken jumys isteidi, onyń ishinde tabys salyǵyn tóleýden bosatý túrinde salyq jeńildikterin alý úshin barlyǵy 579 internet-dúken tirkelgen.
2019 jyly qolma-qol aqshasyz tólemder kólemi 2,3 esege artyp, shamamen 14,4 trln teńgeni qurady (2018 jyly – 6,4 trln tg). Ósim saýda POS-terminaldary infraqurylymynyń damýymen, Qazaqstan naryǵyna Apple Pay jáne Samsung Pay-diń shyǵýymen, bankterdiń bonýstar men keshbekter arqyly klientterdi yntalandyrýymen, sondai-aq qoǵamdyq kóliktiń barlyq túrlerinde qolma-qol aqshasyz tólemdi belsendi paidalanýmen bailanysty.
2019 jyly elektrondyq saýdada 36,8 myń jańa jumys orny ashyldy. Elektrondy saýda arqyly qazaqstandyq taýarlardyń eksporty $5 mln jetti. AHQO-da tirkelgen Wildberries halyqaralyq kompaniiasynyń platformasynda 21 qazaqstandyq kompaniia EAEO elderinde 594 taýar túrin satady. Taiaý keleshekte ótkizý aýmaǵy EO elderine keńeiedi.
«E-kommertsiianyń qarqyndy damýyna bailanysty jańa mamandyqtar ashylyp jatyr, jumys oryndarynyń sany ósýde. Sondyqtan Qazaqstannyń iri qalalarynda e-commerce ortalyqtarynyń bazasynda oqytýdy keńeitý kerek», — dedi A. Mamin.
Úkimet basshysy bir apta merzim ishinde ótken jyly qabyldanǵan Elektrondyq kommertsiiany damytý jónindegi 2025 jylǵa deiingi jol kartasyn jandandyrýdy tapsyrdy.
