Qazaqstan Úkimeti Prezident Qasym-Jomart Toqaevtyń tapsyrmalaryn tiimdi iske asyrý úshin jumys tásilderin qaita qaraýy kerek. Parlament Májilisiniń depýtaty, QR Prezidenti janyndaǵy áielder isteri jáne otbasylyq-demografiialyq saiasat jónindegi ulttyq komissiianyń tóraiymy Lázzat Ramazanova osyndai pikir bildirdi, dep habarlaidy QazAqparat.
«Eldi túbegeili reformalar kútip tur. Aldaǵy ailar, ministrler men barlyq deńgeidegi sheneýnikterden bastap búkil parlamenttik partiialardyń depýtattaryna deiingi barlyq memlekettik apparattyń beriktigin synaý mezgili bolady dep sanaimyn», – dedi Lázzat Ramazanova Facebook paraqshasynda.
Sonymen qatar, ol Memleket basshysynyń ótken Májilis otyrysynda alǵa qoiǵan mindetteriniń mańyzyn atap ótti.
«Birinshi kezekte, bul halyq tabysynyń ósýin qamtamasyz etý, baǵany turaqtandyrý jáne infliatsiiany tómendetý. Bul ózgeristerdi árbir turǵyn tek esepterde ǵana emes, is júzinde óz qaltasynda seziný qajet. Arnaiy qyzmetterde, IIM men kúshtik qurylymdarda qysqa merzimde sapaly reformalar júrgizý asa mańyzdy. El turǵyndary ózderin qaýipsiz sezinýi tiis», - dep atap ótti ulttyq komissiia basshysy.
Lázzat Ramazanova bilim sapasyn arttyrýǵa, az qamtylǵan otbasynan shyqqan balalar úshin granttardy ulǵaitýǵa jáne eńbek naryǵyna sáikes kadrlar daiarlaýǵa bailanysty máseleler blogyn mańyzdy dep sanaidy.
Ol, sondai-aq, áielder isteri jónindegi ulttyq komissiia Prezidenttiń Jarlyǵymen bekitilgen otbasylyq jáne genderlik saiasat tujyrymdamasyn iske asyrýdy jalǵastyrýǵa nietti ekenin aitty.
«Bilik halyqtyń sózin esti alatynyn kórsetti. Endi áreket etý kerek. Sózden iske aýyspaityn bolsaq, bul eshqashan aqtalmaidy da keshirilmeidi de», - dedi Lázzat Ramazanova.
