QR Premer-Ministri Asqar Maminniń tóraǵalyǵymen ótken Úkimet otyrysynda Úkimettiń zań jobalaý jumystarynyń 2019 jylǵa arnalǵan josparynyń oryndalý barysy jáne 2020 jylǵa arnalǵan jospar jobasy qaraldy, dep habarlaidy "Ult aqparat" primeminister.kz saityna silteme jasap.
QR ádilet ministri M. Beketaev baiandama jasady, ol biyl Parlamentke «Pedagog mártebesi týraly», «Halyq densaýlyǵy jáne densaýlyq saqtaý júiesi týraly» kodeksti, Ekologiialyq kodeksti jáne t. b. qosa alǵanda 32 zań jobasy engizilgenin aitty.
«2020 jylǵa arnalǵan jospar jobasyna ózekti jáne mańyzdy máselelerdi sheshýge, Tuńǵysh Prezident – Elbasy Nursultan Ábishuly Nazarbaev pen Memleket basshysy Qasym-Jomart Kemeluly Toqaevtyń tapsyrmalaryn oryndaýǵa baǵyttalǵan 17 zań jobasy engizildi», — dedi A. Mamin.
Memleket basshysynyń sailaýaldy baǵdarlamasyn jáne Joldaýyn iske asyrýǵa arnalǵan zań jobalary qarastyrylǵan. Jańa zań jobalary, sonyń ishinde,«Ardagerler týraly», «Ósimdikter álemi týraly» jáne áreket etip turǵan zańnamaǵa ózgerister engizýdi kózdeitin taǵy da basqa birqatar zań jobalary ázirlenedi.
Premer-Ministr memlekettik organdardyń birinshi basshylaryna zań jobalaý jumysyn jeke baqylaýǵa alýdy tapsyrdy.
«Josparly zań jobalaryn engizý merzimderi buzylǵan jaǵdaida tikelei birinshi basshylardyń jaýapkershiligi qaralatyn bolady», — dep A. Mamin, Ádilet ministrligine Úkimettiń zań jobalaý jumystarynyń 2020 jylǵa arnalǵan josparyn iske asyrý kezinde jalpy baqylaýdy kúsheitýdi tapsyrdy.
