Úkimet qaýlysymen rezervten Soltústik Qazaqstan oblysy Petropavl qalasyndaǵy jylý magistraliniń qurylysyn aiaqtaýǵa shamamen 650 mln teńge bólindi, dep habarlaidy ult.kz.
Júieli jańǵyrtý Memleket basshysynyń Parlament palatalarynyń birlesken otyrysynda elimizdiń energetikalyq jáne infraqurylymdyq áleýetin nyǵaitý jóninde bergen tapsyrmalary aiasynda júzege asyrylýda.
Tiisti qaýlyǵa Premer-ministr Oljas Bektenov qol qoidy.
Qarajat J.Jabaev – A.Shájimbaev – Novaia – Y.Altynsarin kósheleri boiyndaǵy ýchaskelerdegi jylý jelisiniń qurylysyna baǵyttalǵan.
2026 jyly 1,4 shaqyrym demontajdalyp, jańa jylý jelileri tartylady. 2025 jyly 0,7 shaqyrym jylý jelileri jańartylǵan. Osylaisha, bólingen qarajatqa Petropavl qalasyndaǵy uzyndyǵy 2 shaqyrymnan asatyn № 2 magistralin jóndeý jumystary aiaqtalady.
Jobany júzege asyrý 80%-dan astam tozǵan magistraldy aýystyrýǵa jáne 30 myńnan astam qala turǵynyn nemese 200-den astam kóppáterli úi men áleýmettik sala nysanyn jylýmen qamtý senimdiligin arttyrady, sondai-aq qalanyń jylý jelileriniń tozý deńgeiin tómendetedi.
Úkimet aldaǵy jylý berý maýsymyna daiyndyqty turaqty baqylaýda ustaýda. QR Energetika ministrliginiń málimetinshe, 2025 jyldan beri elektr stantsiialaryndaǵy 10 energiia blogyna, 63 qazandyq pen 39 týrbinaǵa kúrdeli jóndeý júrgizildi. Sonymen qatar 17 myń shaqyrym elektr taratý jelisi jańartylyp, 420 qosalqy stantsiia jańǵyrtyldy jáne eń kóp tozǵan 323 shaqyrym jylý jelisi aýystyryldy. Nátijesinde elektr stantsiialary jabdyqtarynyń tozý deńgeii 53%-ǵa, jylý jelileriniń tozý deńgeii 50%-ǵa deiin tómendedi.
