QR Premer-Ministriniń orynbasary Gúlshara Ábdiqalyqova bastaǵan Úkimet músheleri Qostanai oblysyna jasaǵan saparynyń ekinshi kúni Rýdnyi qalasyna bardy, dep habarlaidy "Ult aqparat".
Aldymen Gúlshara Ábdiqalyqova Eńbek jáne halyqty áleýmettik qorǵaý ministri Berdibek Saparbaevpen birge Sokolov-Sarybai ken óndirý birlestiginiń kadrlardy oqytý ortalyǵynyń jumysymen tanysty. Ortalyq direktorynyń mindetin atqarýshy Ilia Porhomenko aitqandai, qazir munda mamandar 7 baǵyt boiynsha bilim alýda.
«Kadrlardy oqytý ortalyǵy biliktilikti arttyrý, jumystaǵy tehnikalyq saqtandyrý, jaraqat alýdyń aldyn alý, kóshbasshylyqqa baýlý sekildi baǵyttarda jumys isteidi. Bilim alýshylarǵa barlyq jaǵdai jasalǵan, tehnikalyq jaǵynan qamtamasyz etildi. Ótken jyly 51643 mamandy qaita oqytyp shyǵardyq. Onyń 3831-i tájiribeden ótken mamandar», - dedi Ilia Porhomenko.
Vitse-premer Rýdnyiǵa kelgen jumys saparynyń maqsatyn túsindirip, ken óndirýshilerdiń saýaldaryna jaýap berdi. Onyń aitýynsha, qazirgi ýaqytta jalaqynyń ýaqytyly tólenbeýi eńbek daýlarynyń týyndaýyna ákelip soqtyrady.
«Kásiporyn men jumysshy arasyndaǵy eńbek daýlarynyń 30 protsenti jalaqy qaryzyna bailanysty týyndaidy. Sodan soń eńbek qaýipsizdigine qatysty máseleler. Osyǵan bailanysty jumys berýshiler jyl saiyn jalaqyny ósirip otyrǵandary jón. Sońǵy 10 jylda elimizde ortasha jalaqy 2,5 esege ósken. Bul turǵyda Qostanai oblysy jaqsy jumys atqardy», - dedi Gúlshara Ábdiqalyqova.
Ilia Porhomenkonyń sózinshe, Sokolov-Sarybai ken óndirý birlestigi jumysshylarynyń ortasha jalaqysy - 220 myń teńge. Al ekskavatorlar jospardy oryndaǵanda 320 myń teńgege deiin alady. Eń bastysy, ailyq keshiktirilmei ýaqytyly beriledi. Jumysshylar barlyq áleýmettik paketke ie bolady.
Aita keteiik, Úkimet músheleriniń oblysqa saparynyń maqsaty - Elbasynyń «Áleýmettik qamqorlyq» jańa áleýmettik sharalarynyń negizgi baǵyttaryn túsindirý.
