Búgin QR Premer-Ministriniń orynbasary Gúlshara Ábdiqalyqova bastaǵan jumys toby Qostanai oblysyna bardy, dep habarlaidy "Ult aqparat".
Top quramynda Bilim jáne ǵylym ministri Kúlásh Shámshidinova, Densaýlyq saqtaý ministri Eljan Birtanov, Eńbek jáne halyqty áleýmettik qorǵaý ministri Berdibek Saparbaev bar. Jumys toby sapar barysynda eń negizgi 3 baǵytqa kóńil bóldi. Áýeli, eń muqtaj azamattarǵa, az qamtylǵan otbasylarǵa kómek berýdiń jai-japsaryn túsindirý. Munan soń baspana máselesin sheshý boiynsha qolǵa alynǵan naqty jumystar retin talqylaý. Úshinshiden, bilim jáne densaýlyq salalary boiynsha atqarylǵan sharalardy saralaý.
Gúlshara Ábdiqalyqova aldymen kóp balaly otbasylarmen, az qamtylǵan azamattarmen kezdesý ótkizdi. Sonyń biri - Shákirovtar otbasy. Jaqynda 8 bala tárbielep otyrǵan Janna Shákirovaǵa metsenat Igor Kim úsh bólmeli páter alyp berdi.
«Osy ýaqytqa deiin qala ortalyǵynda balalarymmen 90 myńǵa páter jaldap turdym. Memleketten 106 myń teńge kómek alyp turamyn. Degenmen, kúndelikti turmystyq shyǵyndardy eseptegende qarajat jetpeidi. Endi kásipker kómeginiń arqasynda kópten kútken qýanyshqa kenelip otyrmyz», - deidi Janna Shákirova.
Premer-Ministrdiń orynbasary búginde halyqtyń tabysyn arttyrý jáne ál-aýqatyn jaqsartý boiynsha sharalar kesheni qabyldanyp jatqanyn aitty. Sonymen qatar, ol memleketten eńbekke jaramsyz azamattarǵa jáne ýaqytsha ómirlik qiyn jaǵdailarǵa tap bolǵan adamdarǵa kómek kórsetiletinin atap ótti. Al jumys isteýge qabiletti basqa adamdar memleket usynyp otyrǵan jumyspen qamtýdyń barlyq formalaryna qatysýy tiis.
Úkimet músheleri bekitilgen kestege sai halyqqa qyzmet kórsetý jáne jumyspen qamtý ortalyqtarynyń jumystarymen tanysady.
Kúnniń ekinshi jartysynda Qostanai aýdanyndaǵy «Altyn dán» mádeniet úiinde turǵyndarmen kezdesedi.
Jumys tobynyń birinshi kúni E.Ómirzaqov atyndaǵy filarmoniiadaǵy jalpy jiynmen túiindeledi. Basqosýda «Eńbek» baǵdarlamasynyń Qostanai oblysynda oryndalýy sóz etiledi.
