Foto: ashyq derekkóz
Qazaqstan Respýblikasy Prezidenti Qasym-Jomart Toqaevtyń agrarlyq sektordy turaqty túrde sýmen qamtamasyz etý boiynsha bergen tapsyrmasyn iske asyrý aiasynda Úkimet rezervinen Qyzylorda oblysynyń qajettilikteri úshin 53 jyljymaly dizeldi sorǵy stansasy satyp alýǵa shamamen 1 mlrd teńge bólindi. QR Premer-ministri Oljas Bektenov tiisti qaýlyǵa qol qoidy, dep habarlaidy Ult.kz.
Mamandardyń esebinshe, jańa jabdyq magistraldi arnalarda sý deńgeii tómen bolǵan kúnniń ózinde 6 myńnan astam gektar jerdi sýaryp turýǵa múmkindik beredi. Sorǵy stansalary magistraldi jáne sharýashylyqtar aralyǵyndaǵy arnalardan ishki sharýashylyq jelilerine sý jiberý úshin qoldanylady.
Óńirde 126,4 myńnan astam gektar jerge sýarmaly egin egilgen, onyń 82,4 myń gektary kúrish. Aǵymdaǵy sýarý maýsymynda josparlanǵan sý kólemi 2,5 mlrd tekshe metr quraidy.
Oblys ákimdigi «Qazsýshar» RMK-niń Qyzylorda filialymen birlese arnaiy monitoring tobyn jasaqtap, Syrdariiadan kelip jatqan sý kólemine sáikes, bes magistraldi jáne úsh sharýashylyqtar aralyǵyndaǵy arnalarǵa sý berý kestesin ázirlep, bekitti.
Qyzylorda oblysynyń agroónerkásiptik kesheni transshekaralyq sý resýrstaryna tikelei táýeldi ekenin eskere otyryp, óńirdi turaqty túrde sýmen qamtamasyz etip, astyq ónimdiligin jáne azyq-túlik qaýipsizdigin saqtaý memlekettiń basty mindeti bop qalady.
